State hlim berah Mizoram bawk Chhe lailet kan la ni lo – MNF

State hlim berah Mizoram bawk
Chhe lailet kan la ni lo – MNF
Zirchiangtu pakhatin an zirchiannaah Mizoram chu a tum hnihna atan ‘State him leh hlim ber’ – Happiest State ah a puang nawn a. Mizoram chhe lailet der anga sawi a nih mek laiin, sawrkar leh mipui kan la chhe vek loa, hma kan sawn zel tih tarlanna a ni tih MNF party chuan an sawi.
AMC corporator David Zohmangaiha hoa MNF Media & Publicity hruaitute sawi danin, ‘India’s Happiness Professor’ tia hriat lar, Gurugram-a Management Development Institute hotu leh researcher Prof. Rajesh K Pillania kaihhruaia zirchiannaah Mizoram chu India ram state zingah ‘Happiest State’ an puang a, kum 2020 khan an ni tho hian Mizoram hi ‘Happiest State’ ah an lo puang tawh bawk.
Zirchiannaah hian chhungkaw inlaichinna, zirlai leh zirtirtu inlaichinna, hnathawh kaihhnawih thil, vantlang nun leh mihring chawikanna, sakhua, Covid hriin rilru leh taksa hriselna a nghawng dan te atangin tehfung siam a ni a. Heng tehfung hrang hranga hmang hian India ram dinhmun zirchian a ni a, Mizoram chu state hlim bera puan a ni tih an sawi.
Zirchiangtute tarlan danin, Mizorama vantlang inrelbawlna mumal tak hian thalaite hlimna a thlen a; Mizo khawtlang nunah hmeichhia leh mipa thliar a ni loa, naupang an nih lai atangin an tel vek thei a; Thalaiin hna telua an sawi loa, hmeichhe naupang leh mipa naupang enhranna awm loin hnathawh chu chawisan a ni tih te a nih thu MNF hian an sawi.
Zirchiannaah hian, Mizoram chu chhungkaw kehchhia tamna a nih tho rualin, thalai zingah nuin an tet lai atanga hna a thawhsan emaw eizawnga an vahchhuahsante pawh hlamchhiah an ni chuang loa, nun khawchhuah dan zirtir an ni. Anmahhni pawhin sum thawkchhuak turin an bei nasa a, chu chuan midang rinchhan loa eizawng theiin an awm thuai tih an hmuchhuak tih tarlan a nih thu an sawi bawk.
Zirlai thenkhat an kawm atangin zirtirtute chu thiamna petu ni mai loin, zirlaite thian tha tak te an nih bakah an thil tawn engkim an hrilh ngam tih a sawi a. Hei hian zirtirtute leh nu leh pa hnena harsatna hrilhriat lamah timna an nei loa, chu chuan inlaichinna tha a siam zawk, tih te tarlan a nih thu an sawi a ni.
“State hlim ber kan nih theih chhan lian tak pakhat, thalai zinga hlim an tam chhan hi chibil inthliarna awm lohna khawtlang a nih vang niin an tarlang,” David Zohmangaiha chuan a ti.
India rama state hlim ber kan nih theih chhan hi sawrkar tha, mipui sawrkar, miretheite hnen thleng phak sawrkar a nih vang a ni, tiin, India ram thang chhuak khawpa rorelna tha kalpuitu Pu Zoramthanga kaihhruai sawrkar chu an chhuang hle tih MNF party aiawhte hian an sawi.