State leh UT 11 din champha lawm

On Nov 6, 2025 4 0

State leh UT 11 din champha lawm
Ek Bharat Shreshtha Bharat hmalakna hnuaiah Mizoram larsap Gen. Vijay Kumar Singh (Retd) hoin Thawhlehni khan Delhi, Lakshadweep, Puducherry, Haryana, Kerela, Karnataka, Madhya Pradesh, Punjab, Tamil Nadu, Uttarakhand leh Jharkhand state din champha ‘Foundation Day’ chu Raj Bhavan Aizawlah lawm a ni.
Larsap chuan state leh union territory 11 Foundation Day lawm a ni chu lawmawm tiin, Prime minister hmalakna ‘Ek Bharat Shreshtha Bharat’ chu hnam hrang hrang inpumkhatna leh inunauna tha siam tuma ruahman a ni tih a sawi. India rama state/UT tinin danglam bikna an nei, tiin, “Kan danglamna hi kan chakna hnar a ni a, India ram intodelh ‘Vikshit Bharat@2047’ ni tura hmalam min pan tirtu pawimawh tak a ni,” a ti.
Midangte hnam ziarang, nunphung leh tih dan hriata zah sak a tul tih sawiin, an kalna hmun apiangah mahni state ziarang, nunphung leh tih dan chawilara midangte zirtirtu nih tum turin a chah.
Heng UT leh state din champha lawm thenkhat larsap-te thuchah thlirho a ni a. Heng state atanga Mizoram-a hna thawka awm thenkhat atangin an state chanchin ngaihthlak a ni bawk.
Lakshadweep, Karnataka, Kerela, Tamil Nadu, Uttarakhand leh Jharkhand chanchin thlirho a ni a. ICFAI University leh NIT Mizoram zirlaiten cultural item an entir a ni.
Puducherry hi 1954 November 1 khan UT a a ni a; 1956 November 1 khan Delhi leh Lakshadweep chu UT niin, hemi ni vek hian Kerela, Karnataka, Madhya Pradesh leh Tamil Nadu chu state-a hlankai an ni. 1966 November 1 khan Haryana leh Punjab siamremin state-a puan an ni a. 2000 November 9 khan Uttrakhand state siam niin, 2000 November 15-ah Jharkhand state a piang a ni.
Ek Bharat Shreshtha Bharat programme hian India rama state leh UT hnuaia cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh inhriatthiam tawnna nasa zawk siam a tum a. He programme kaltlang hian India rama state leh UT hrang hrang din champha lawmna chu Raj Bhavan Mizoramah larsap kaihhruaiin June 2023 atang khan neih a ni.