State pathum din champha hmang
State pathum din champha hmang
Hmarchhak state pathum – Manipur, Meghalaya leh Tripura State din champha lawmna chu Nilaini khan Raj Bhavan-ah ‘Ek Bharat Shreshtha Bharat’ hmalakna hnuaiah larsap Gen Vijay Kumar Singh (Retd) chuan a buatsaih. Heng state pathum hi January 21 kha an din cham a ni a, remchan zawkna avangin January 29 hian hman a ni.
Larsap chuan Manipur, Meghalaya leh Tripura state-te chu an din cham pual chibai bukin duhsakna a hlan a. Ek Bharat Shreshtha Bharat kaltlanga state dangte din champha inlawmsak thin chuan India ram culture hausak zia leh inpumkhat zia a pholang tih a sawi. Prime minister-in India ram chu kum 2047-ah ram changkang leh intodelh, ‘Vikshit Bharat’ a hlankai a tum kawngah hmarchhak state-ten dinhmun pawimawh tak an luah tih sawiin, “India ram hmarchhak hmun pawimawh tak, thenawm rambuaiin a chim mekte hualvelah kan awm a, hemi karah hian ram inpumkhatna turin mawhphurhna kan neih nasat phah a ni,” a ti.
Foundation Day lawma kalkhawmte chu tun ai zawnga inpawh lehzualna atan state dangte hnam ziarang leh nunphung phur taka hriatchian tum tur leh zahthiam turin a chah a. Hmarchhak state-te leh India ram hmun dangte tunhma zawng aia an inpawh ta chu lawmawm a tih thu sawiin, thalaite chu an hawiher tizau deuh deuh turin a fuih. State hrang hrang aiawh thusawitu leh hnamlam entirtute fakawm a tih thu sawiin, Vikshit Bharat ni thei tura theihtawp chhuahpuiah a sawm a ni.
Lawmnaah hian Manipur larsap Ajay Kumar Bhalla, Meghalaya larsap CH Vijayashankar leh Tripura larsap Indra Sena Reddy Nallu te thuchah video chu thlirho a ni a. Manipur state aiawh Dr Rebecca Angom, Pachhunga University College-a associate professor, Meghalaya aiawh State Bank of India chief manager Premika Blah leh Tripura aiawh Dr. Achinta Badya, Mizoram University-a assistant professor ten an state chanchin an sawi a. State pathum zirlai RIPANS atanga telten hnam lam an entir a ni.
Manipur leh Tripura hi kum 1949 khan India-ah betin kum 1956-ah union territory pek an ni a. Meghalaya hi tunhmain Assam state hnuaiah awmin kum 1969 khan autonomous state a ni. Heng state pathum hi 1972 January 21 khan North Eastern Region (Re-organisation) Act 1971 hmangin state puitlinga hlankai an ni.
Ek Bharat Shreshtha Bharat programme hian India rama state leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. He programme kaltlang hian India rama state leh UT-te Foundation Day lawmna chu Raj Bhavan Mizoramah larsap kaihhruaiin 2023 June atang khan buatsaih thin a ni.