State pathumah BJP, pakhatah Congress

Mizoram inthlan ruala inthlang state pali-ah sorkar tur a chiang tawh a, state pathumah BJP, pakhatah Congress an chak.
Mizoram ang bawka November ni 6-a vote thlak state palite inthlan vote hi Chawlhni khan an chhiar a ni.
Bial 230 awmna Madhya Pradesh BJP-in bial 166 an la a, Congress-in bial 63, mi dangin bial khat an la. Bial 199 awmna Rajasthan-ah BJP-in bial 116 an la a, Congress-in bial 69, BSP-in bial hnih, a dangin bial 12 an la. Bial 90 awmna Chhatisgarh-ah BJP-in bial 54 an la a, Congress-in bial 36 an la. Bial 119 awmna Telangana-ah Congress an chak a, bial 64 an la. He state-ah hian BJP-in bial kua chauh an la a, BRS-in bial 40, AIMIM-in bial ruk an la a ni.
“Chhattisgarh, Madhya Pradesh leh Rajasthan te result hian India ram mipuite’n good governance leh hmasawnna, BJP dinna hi an duh tih a tilang,” tiin India ram prime minister Narendra Modi chuan a sawi.
Congress hruaitu pawimawh Mallikarjun Kharge chuan state pali mipuite hnenah lawmthu a sawi a, an harsatnate hnehin Lok Sabha inthlan lo awm tur atan theihtawp an chhuah dawn tih a sawi.
Rajasthan leh Chhattisgarh te hi Congress sorkar mekna a ni a, BJP lakah an hloh ta a ni. BJP sorkar mekna Madhya Pradesh-ah hian BJP elpui ber chu Congress an ni bawk a, chuvangin heng state pathumah hian BJP leh Congress inel hi politics ngaihvente titi a tling.
Madhya Pradesh-ah hian exit poll tam berah BJP chu chak tura dah an ni a, Chhattisgarh-ah exit poll hrang hrangah Congress chu chak ber turah an dah bawk.