State police kutah raltlan 126 hlan
Border Security Force-in Bangladesh atanga Bawm raltlan mi 126 Damdepa an lo man khawm chu Bangladesh-a nawr kir leh an tum laiin, Delhi-a cham mek chief minister Lalduhoma chuan, ramri kana Mizoram chhung an lo thlen tawh chuan, state sawrkar mawhphurh a ni a, engti kawng mahin thawnkir rem a ti lo tih Prime minister Narendra Modi a sawipui hnuah, raltlante hi nawr kir loin Mizoram Police kutah hlan an ni zawk dawn.
Home minister K Sapdanga sawi danin, Bawm raltlante hi BSF hian nawrkir leh tumin Inrinni khan ramri bul Kamtuli-ah an phur kir a. Union Home ministry atanga thu an hmuh tak avangin BSF hian Kamtuli atangin Chhippui khuaah an phur kir a, July 7 chawhnu dar 3.30 khan mi 42 phurh thlen an ni tawh. Chhippui khuaah tihfel ngai an tihfel hnu ah Chamdur P an panpui anga, state police kutah hlan an ni dawn a ni.
Raltlante dawngsawng tur hian Lawngtlai DC office atangin civil officer-te, SDPO-ten buhfai kengin Pathianni chawhnu khan Chamdur an thleng tawh a, Chawngte SDPO hoin Mzoram Police-in an escort a ni. Bawm zirlai hruaitute leh Tuichawng Group YMA hruaitute pawhin raltlante hi an tawiawm a, Mizoram Police kuta an awm hunah an chenna tur an ngaihtuahpui nghal dawn tih sawi a ni.