State PWD enkawl loh kawng pawh a chhiat chuan chet a ngai – PWD minister

Mizoram PWD-in a enkawl tawh loh kawngpui pawh a chhiat a siamthat a nih mai loh chuan an chet a ngai tho thin a, sum pawhkhawm chawp a ngai thin tih PWD minister Vanlalhlana chuan a sawi.
Assembly Session-a zawhna chhangin minister chuan, Aizawl to Vairengte kawng chu sawrkar laipui Ministry of Road Transport & Highways (MoRTH) ta niin a hnuaiah Mizoram PWD-in chan a nei ve a. Kawng chhia siamthat a nih theih nan erawh state sawrkarin theihtawp a chhuah a, kawng hi siamthat reng a ni a, fur hmaa a theih ang chin chin siam tum a ni tih a sawi.
Minister sawi danin, Vairengte to Bilkhawthlir chu NHIDCL enkawl a ni a, Mizoram PWD-in a hriatpui lo. Bilkhawthlir to Kolasib chu Mizoram PWD kut niin, a siam hna hi contractor hnenah pek a ni a, a enkawl chhunzawm hna pawh kumin June 2 thleng contractor kutah a awm.
Kolasib to Kawnpui chu NHIDCL hnena hlan a ni a, Mizoram PWD-in a hriatpui lo. Kawnpui to Khamrang chu Mizoram PWD enkawl niin contractor hnenah a siam hna pek a ni a, a enkawl chhunzawm pawh 2025 June 15 thleng niin, tunah hian kawng siamthat thuai an tum nia hriat a ni.
Khamrang to Buichali chu 2021 November 16 khan NHIDCL hnena hlan niin, Mizoram PWD enkawl a nih laiin contractor-in a thawk tha lo a, ban a ni a, security deposit cheng nuai 73 pawh hrensak niin, kawng siam nan NHIDCL hnenah hlan a ni.
Buichali leh Sairang inkar chu NHIDCL kut niin, Sairang to Aizawl chu Mizoram PWD kut a ni a, resurfacing turin MoRTH hnenah thehluh a ni tawh a, sanction nghah mek a ni.
Contractor-te hian an mawhphurhna a zawh hma chu a thawmthat leh leiminna hnuhma senghawi thlengin an mawhphurhna a nih laiin an ti tha lo a, kawng siam laiin a chhe lai a awm a, chu chu an harsatna tawh a ni tih Vanlalhlana hian a sawi.
Truck a tlu a, an kal ngam lo a, sawrkar a che lo thei loa, sum dapkhawmin department-in kal theihna turin a buaipui a, boulder lakhawmin furpuia kawng tlang loh kan hlau a, rilru leh taksa inbuatsaihin furpuia lirthei dang thei tur sut kan tum, tan kan la a ni,” a ti.
Kawnpui to Hortoki siam hun tur, ruahmanna a awm lem lo niin a sawi a. Mualkhang kawng pawh a sawi maithei lo tih a sawi. Four lane laih turah engkim peih a ni a, forest clearance a la awm lo a, NHIDCL-in contractor a thlang tawh a, tan theih thuai an beisei tih a sawi a ni.