State university neih loh vangin Mizoramin sum chan

Rashtriya Uchchatar Shiksha Abhiyan (RUSA) leh National Education Policy of India 2020 hnuaia Mizorama college-ten hamthatna an dawn theih cheng vaibelchhe 12926.10 chu state university neih loh avangin dawn a ni lo tih sawi a ni.
National Policy on Education 1986 chu kum 34 hman a nih hnuin Union Cabinet chuan National Education Policy of India 2020 (NEP) chu hman turin a pawm a. Mizoram University chuan NEP 2020 hi academic session 2022- 2023 khan postgraduate programme zawng zawngah a hmang tan a; undergraduate bikah NEP 2020 hi rokhawlhna hrang hrang, a bulpui berah University Grants Commission-in Curriculum Framework and Credit System (syllabus leh mark pek dan) draft a chhuah tlai vangin academic session 2022- 2023 ah hman a la ni ve lo thung.
NEP 2020 hman chhoh dan bakah hmachhawp awmte chu Nilaini khan Higher & Technical Education leh School Education aiawhten MZU hmunah sawihona a buatsaih a. Mizoram University registrar Prof Lalnundanga chuan NEP an hmanna te a sawi. NEP 2020 ah hian MZU hnuaia college hrang hrangte tan hamthatna tam tak a awm rualin harsatna hrang hrang a kengtel a. Kum 2035 hnulamah MZU hnuai atanga degree an pek hrang hrangte chu pek chhuah a nih theih tawh dawn loh avangin Mizoram sawrkarin state university a din thuai a ngai dawn tih sawi a ni.
NEP 2020 chuan innghahna lungphum panga – mipui ban phak, mipui hleih nei lo, thatna, man man zawka zirna leh rintlak tih te a nei a. Zirlaiten an duh tak an zir theihna atan zalenna zau tak pek, zirlaiten hmun hrang hranga an zir zawm theihna tur remchang siamsak, graduate kum li chhung zirna siamthar, National Research Foundation duan tel leh India rama zirna khaikhawmtu chi hrang hrang awm chu hmunkhata awm tura buatsaih chu NEP 2020 ngaihpawimawh zual a ni.
Zirna tha taka kalpui a nih theihna turin central leh state sawrkar te chu zirna lam atan GDP zaa paruk tal nei turin ruahmanna siam tura tih a ni bawk, tih te sawi a ni.