Lok Sabha-in Forest Conservation Act pawm

Mizoram telin, pawm loh tura na taka nawr mek Forest Conservation (Amendment) Bill chu, lower house – Lok Sabha-ah pawm a ni.
State sawrkar ten an huamchhunga ramngaw humhalhna dan an hman mek, Forest Conservation Act 1980 hnuaiah state sawrkar chuan a remtihna a pek loh chuan ramngaw (forest land) chu hmasawnna kaihhnawih emaw ram venhimna kaihhnawih emaw leh thildangah (non-forest) pawh a duh anga a hman a khapsak a. He thila state sawrkar thupek kalh tum emaw an awm chuan National Green Tribunal hnenah an zualko thei ang, tih a ni.
He dan hman lai thlakna atana dan thar duan tumna Bill, Nilaini Lok Sabha-in a pawm thar tak hian forest land thenkhat chu a telh ta lo a. Chuti chungin dana siam a nih chuan ‘forest land’ huangchhunga awm chu forest dan hian a humhalh thei dawn tawh lo a ni.
He dan hman tum sawiseltu chuan sawrkar laipuiin ramri hrul hnaih ram a duh anga a hman theihna tur ruahman dan hian kawh bik fel tak nei loin a huamzau thei lutuk a, chu chuan hmansual theihna kawng a hawng zau tih an sawi a ni. A bikin India hmarchhak lam Himalaya tlang bawh ram, humhalh bik ngaite chu a tichereu nasa thei hle dawn tih an sawi.