STI Hub hnuaia project kalpui thlirlet

STI Hub hnuaia project kalpui thlirlet
Science Technology & Innovation (STI) Hub Mizoram chuan an project principal investigator, Rural Development minister Prof. Lalnilawma hoin an thukhawm a. MZU (PI incharge) Dr Lalhmingliana Renthlei leh thawktute an tel.
STI Hub Mizoram hi G20 peng pakhat, ‘Civil 20’ hnuaia project din a ni a. 2023 April 25 khan Mizoram larsap Dr Hari Babu Kambhampati chuan Mizoram University-ah a hawng.
He project hi Department of Science Technology bultuma kalpui niin, MZU leh Amrita Vishwa Vidhyapeetham Kerela tangdun enkawl a ni. Project thupui atan “Improving Tribal Livelihoods, Education and Sustainability (ITLIVES)” tih a ni a, Mizorama tribal-te dinhmun chawikan leh tihhmasawn chu an tum ber a ni.
He project hnuaiah hian team hrang hrang pali an awm a. Team 1-na Digital Literacy & Adolescent Awareness Ambassador hian zirna in, home (child care institution) leh Sunday School-ah hun an hmang thin. Tun thlengin school 20, home 3, Sunday School 4 leh anganwadi workers training-ah thupui thlan bik hmangin tum 113 hun an hmang tawh a. Zirlai naupang 3206 hnenah training an pe tawh.
Team 2-na Food & Nutrition hian naupangten eitur hrisel leh tha an dawn theihna atan zirtir hna thawkin, anganwadi centre-a sem tur eitur hrisel an siam chhuak tawh bawk. F&N Team hian anganwadi centre 37 tlawh tawhin, thawktu, naupang leh nu leh pa 560 hnenah training an pe tawh a ni.
Team 3-na Ayurveda & Health Team hian Mizorama ramhmul damdawi leh a hmangtu (traditional healer) zawngchhuakin, an ni nena tangdun hian an damdawi hmuh chhuah tawhte mi nawlpui banphaka a awm theihna’n tih hmasawnna kawngah hma an la a. BSUP, upa pawl, village /local council, old age home leh rescue home ah a thlawna inentirna tum 10 buatsaih tawhin, damlo inentir 709 hnenah a thlawn vekin damdawi an sem tawh a ni.
Team 4-na Agro-Forestry hnuaiah sawrkar department-te nen tanghoin ngelnghet zawka thingtlang lo neih (sustainable jhum cultivation) a awm theihnan hma an la a. Tunah hian Alder (Hriangpui) Plantation enchhin mek a ni.