Strait of Hormuz khar lo tura Iran be turin US-in China bia
Strait of Hormuz khar lo tura Iran be turin US-in China bia
US Secretary of State Marco Rubio chuan China biain Iran-in khawvela lawnga inkalpawhna kawng pawimawh ber pakhat, Strait of Hormuz khar a tum chu dang turin a ti.
Iran-a sorkar enkawl Press TV-in an parliament-in Strait khar tumin thutlukna a siam tawh a, thutlukna tawp siam turin Supreme National Security Council kuta dah a ni tih a puan hnu lawkah Rubio hian Beijing hi a dawr zui a ni.
He lawng kawngpui hi khar a nih chuan tuialhthei inpekna nasa taka buaiin eibarah nghawng na tak a nei thei dawn a. China hi khawvela Iranian tuialhthei leisak tam bertu a nih bakah Tehran nen inkungkaihna tha tak nei a ni.
US-in Iranian nuclear hmun a beih hnu atang khan tuialhthei man a to nghal a, Brent crude pawhin thla nga chhunga a san lai ber a tawng nghal.
“Beijing-a Chinese sorkar chu tuialhtheiah Straits of Hormuz-a innghat nasa an nih avangin hemi chungchang hi Iran sawipui turin ka bia a ni,” tiin Rubio chuaan Pathiannia Fox News-in an kawmnaah a sawi.
“An khar chuan an tan eibara intihhlumna a ni dawn a. Keini chuan tih dan tur dang kan nei a; mahse, ram dang hian an tuar thei a, keini aiin ram dangin nasa takin an tuar thei a ni,” a ti.
Strait of Hormuz-ah hian Middle East atanga tuialhthei leh boruakalhthei phurh chhuah 20% vel kalpui a ni a. Khar a niha a phurtu an kal theih loh chuan khawvel pumah a man a sang thei dawn.
Thawhtanni khan tuialhthei man hi a sang hret hman a, Brent chu barrel khat $81.40 a ni hman a; mahse, tlai lamah $76.30 velah a tlahniam leh hman.
Tuialhthei thlitfim loh man sang hi mi tin nghawng a ni a, lirthei atan chauh ni lovin supermarket-a ei tur zawrh thleng nghawng thei a ni.
China hian tuialhthei hi ram dang ta aiin Iran ta a lei nasa a, ship tracking firm Vortexa-in a chhinchhiah dan chuan thla hmasa khan ni tin barrel maktaduai 1.8 a la lut ziah ang a n.
India, Japan leh South Korea telin, Asian ram lian dangte pawh tuialhthei thlitfim loh chawk luh nan Strait hi an hmang nasa hle bawk.
US hian kartawpah khan Iran leh Israel indona zawmin President Donald Trump-a chuan Washington-in Tehran-a nuclear hmunte a tichhe vek niin a sawi.
Hetih lai hian US-in a kahna hian eng ang chiahin nge chhiatna a thlen hriat a la ni lo va, UN hnuaia nuclear viltute pawhin lei hnuaia Fordo nuclear sawngbawlna hmuna chhiatna thlen dan an la hre lo va, Iran chuan chhiatna tenau chauh a thleng niin a sawi bawk.