Study Team-in Border Trade Point zirchiang

KMMTTP and Railway Lines Study Team chuan Nilaini khan West Bengal-a India leh Bangladesh inrinaa insumdawn tawnna Border Trade Point tlawhin a zirchiang a. Assembly speaker Lalbiakzama’n a tawiawm.
Land Port Authority of India (LPAI) West Bengal enkawl Integrated Check Post Petrapole (Border Trade Point) hi Asia khawmualpui chhak lam (East Asia) leh India-a Land Port lian ber a ni a. Mizoram pawhin hetiang, ram dang nena ramri behchhan insumdawn tawn theihna lian ICP hi pathum a nei dawn a. Mizo mipui, a bikin thalaite leh sumdawngten he remchanna thar lo chhuak tur hi tangkai lehzuala kan hman theih dan tur, bungrua thawn chhuah leh lakluh thu ah engti hawi zawnga inbuatsaih nge tha ang, tih lam hawi, thiamna leh hmanrua lo neih lawk leh inbuatsaihna kawng hrang hrang hriat tur tul awm thei ang ang hriat a tul tih Study Team hian an sawi.
Study Team chairman T Lalhlimpuia MLA chuan, Mizoram sawrkarin Study Committee a din chhoh dan, Lawngtlai district paltlanga kawng sial, Kolkata panna kawng thar tur – Kaladan Multi Modal Transit Transport Project nakuma hawn tawh mai tur leh, rel kawngten ‘socio- culture & economic impacts’ a neih dan zirchiangtu Committee an ni tih a sawi a ni.
LPAI manager Kamlesh Saini leh Land Customs asst. commissioner Avijit Bose, IRS ten Land Port kalphung an lo hrilfiah bakah ICP hnathawh dan an enpui a. Land Port hotuten tha taka lo dawngsawngin, import & export lama tan lak a tul dan, sawrkar dan leh hrai zawm a tul dan, Mizoram mite pawh sumdawnna remchang thar lo chhuak tur mila inbuatsaih a tul thu an sawi.