SUATAINABLE, INTEGRATED FARMING IN MIZORAM – 37

RK Dawla
Mb 9366095658

1. September thla laihawl kan thleng a. Ruahtui a kiam tan hlek hlek a, khawlum zualpui pawh a reh tan a. Kan sawrkarin kuthnathawktute pualin Monorail a bun tan thu a lar hle. Ropeway leh Monorail hi Mizoram ang tlangram chhengchhia, hmun rem tam lovah chuan, thil tihchi tak leh rual-awh tina êm êm thintu a ni mêk a. tangkai taka kan hman zui leh uar chhoh zel a duhawm hle mai. Thil mak ve deuh chu Mizoram zîm tê, a dung 200km leh a vâng 100km emaw lek hi thil engkimah a diverse êm êm mai a. Mihring chêngte leh tawnghmang, khawsak dan pawh a danglam hle, Mizo hnamho zingah pawh. Thingtlang khaw pakhat area chauh pawh hi tuipui zawl atanga 300m te, 800m te, 1200m te a ni nawk hlawm mai a. Pathian hian Mizoram a lo din danah hian, diversity hi kâwk nghal sa riau a. Kan tlângte hi hriamin tê hle mah se, a kârah kawr a chhawm a, chutah chuan tuifîm leh thianghlim tak a luang thung a. Tlang bial khat lek pawh chhuahchhawng, tlâkdêng a awm zel a. Thil thenkhatah hetianga ram ruang awm hi buaithlakna awm mah se, thil tam takah remchanna riau a awm fo mai.
2. Mizoramah chuan, Pathianin diversity hmanga engkim a lo duansa avangin, hemi formula hi kan hman thiam a pawimawh hle a. Farming lama eizawng a, nun hlimna zawng thinte pawhin he Pathian formula hi kan zawm thui poh leh kan hmalakna a tlo dawn tih a chiang viau mai. Kan ram hi awihtlan tam zawk, ruahtui dawng mumal kumtluan lo, lei chunglang hâng pawh pan tak, riral sam tak a ni a. Thlai chawmna tur leitha kan mamawh tam bik a, kan insiamchawp thiam loh phei chuan, company siam leitha tam tak kan hman a ngai a, thil buaithlak a tam êm êm. Tin, awihpang tam zawk, ruah bawhawk dawng thin kan nih vangin, lei kalral venna leh tuihawk buaipuiin measure na tak kan lâk a tul leh a. Kan sik leh sa ang nei ve lo, kan leilung ang ni lo bawk khawvel ramdang kan entawn fo avang hian kan nih tur ang kan ni lo fo tih a chiang bawk. Kan ram hi Pathianin danglam bikin a siam a, chu danglamna formula diverse tak mai chu kawng tinrengah kan hman thiam a tul thlu tawh khawp mai.
3. Tin, farmer tam ber hian farming-ah kan inpe tâwk lo hle bawk a. Huho nun nuam tizual tak hnam kan ni a, pawl chi hrang hrang kan ngah êm êm. Mi tam tak phei chuan, kan eizawnna (farming) hi Pathian rawngbawlnaah kan ngai mang dêr lo lehnghal a! Pastor te, Tirhkoh te, Evangelist te chuan an hun zawng zawng Pathian thu sawi nân hmang sela, an eizawnna a ni a, a Pathian thu êm êm. Mahsela, a nazawng hian Pathian thu sawi ve sek kan tum a, keini chu hna thawk tur, ei leh bara kan ram tungding tura Pathianin mawhphurhna a pêk kan ni a. Kan kuang lo kan nawr fo niin a lang. Khawvela Inkhawm tam ber hnam hi economically-in kan che chukchu tlat a! Kan ram a dam thei lo niin a lang! Sikul kal thui lo, hnathawh tur dang hre tawh ngang lo khan, farming kan luhchilh chauh mai a. Farmer ni tura lehkha zir a, PhD thlenga inzir tauh tauh phei chu kan vâng khawp ang. Mi rethei chu a huai thei lova, ram intodelh lo chuan kutdawh rilru min neihtir a, hnam thawkrim lovah chuan Corruption a hluar a, ruihhlo ngai tam tak, buaipui ngai an chhuak zawih zawih mai a nih hi. Chuvangin, kumthar kan hnaih leh ta a, 2027 atanga farming luhchilh turte zawng zawng chuan, hnam dangte rual elin, rilru thar nen kan ram tân theihtawp i chhuah mawlh mawlh teh ang u.