Sub-Hqrs. YMA inkhawmpui hmang

Sub-Hqrs. YMA Champhai inkhawmpui vawi 8-na Ruantluanga neih chu Champhai South bialtu MLA, minister TJ Lalnun-tluanga chuan a hmanpui.
YMA chu chhiat that nikhuaa theihtawp chhuah thintu hnam dangte neih ve loh a ni, tiin, hnam zia leh nunphung pholangtu leh chhawmnungtu a ni chu ngaihsanawm a tih thu TJ Lalnuntluanga hian a sawi a. Thlei bik nei loa mipui hrutrualtu a ni leh khawtlang mipui thlamuan fotu a ni thin chu fakawm a tih thu te, pawl ngaihdan niloa tute emaw ngaihdan ang chauha a kal mai lohna’n leh, a thiltum anga a kalzel theihna’n theihtawp chhuaha ven tlan a pawimawh thu te a sawi.
Fur ruahtui tlak hmain NH-06 siam hna, dan zamte tha taka zawm chunga zo hman tura tan lak a ni tih minister hian sawiin, mipui nghahhlelh kawngpui siam kawnga forest clearance buaipui ngaite pawh chak taka bawhzui a ni tih a sawi.
“Ngaihdan hrang hrang nei kan ni maithei, amaherawhchu ram hruaitute thawhpui thiam mi leh finchhuah tul huna finchhuah thintu nih kan tum hram hram tur a ni,” a ti.
Inkhawmpui hi April 18-20 chhungin neih a ni a, thupuiah “Ram leh hnam humhalh” tih hman a ni a. Champhai DFO Lalduhthlana chuan nungcha, tuihna leh ramngaw humhalh chungchang a sawi.
Sub-Hqrs. YMA Champhai hi 2008 June 18-a din a ni a. A hnuaiah hian Group YMA pathum – Tuipuiral, Vanhnuailiana leh Vanapa an awm a, thuthmun Branch 24 an awm. Sub-Hqrs YMA Champhai huamchhungah hian Branch 67 awm mekin YMA member mipa 22061 leh hmeichhia 13326, an vaiin member 35387 an awm a ni.