Subansiri hydroproject hman theih dawn ta

India chuan mega hydropower project kum 20 kaltaa bul a tan tawh chu a hmang thei dawn ta a, hei hian India energy mamawh thui takin a phuhru thei dawn a ni. State-run NHPC Ltd chuan July thla khian Subansiri Lower project Assam leh Arunachal Pradesh huam chu trial run a nei tan dawn a ni.
He hydropower project-a unit hmasa ber chu December thlaah commission hman a nih tur thu finance director Rajendra Prasad Goyal chuan a sawi a. Kum 2024 kum tawp lamah chuan a vaiin unit pariat te chu hman theih vek a ni ang tiin a sawi bawk.
Siam zawh fel a nih chuan he hydroproject hian 2-gigawatt lai a pechhuak thei dawn a, kum 2003 a bultan tawh kha niin mahse khuah duh lohna avanga lungawilohna te environment a tihchhiat tur duhlohna te avangin a khaihlak nasa hle a ni.
Heng avang hian khuahna man tura tih chu a tira ruahman let thumah chhovin $ 2.6 billion vela zawhfel tura ngaih a ni a. Kum riat tehmeuh chhunzawm a nih loh hnuah National Green Tribunal chuan kum 2019 khan chhunzawm a phal leh chauh a ni.
“Hydropower project kalpui a nih hmain department hrang hrang 40 ah remtihna kan lak phawt a ngai a. Tunah chuan tihfel ngai tinte chinfel vek tawh a ni,” tiin Goyal chuan a sawi a. “Khuah tan tawh hnua harsatna awm leh te chuan min tikhaihlak takzet a ni,” tiin a sawi.
Dam lianpui khuah chu local economy tana pawimawh niin hei bakah hian China leh Pakistan ramri hnaiha awm a ni bawk a. Subansiri hi zawhfel a nih dawn ruai laiin NHPC chuan Dibang project 2.9 gigawatt pe chhuak thei India rama hydropower plant lian ber tur chu khuah tumin hma a la mek a. Hydropower te hi sorkar chuan clean energy status a pek avangin hei vang hian fossil fuel atanga power siamchhuahte ai chuan thlan zawk fe a ni bawk.