Subordinate police post ruak hnawhkhat rang turin CM ngen

Subordinate police indaih lohna a nasat em avangin an post ruak 4356 chu hnawhkhat rang turin chief minister an ngen.
Mizoram Police Subordinate Officers’ Association (MPSOA) hruaitu thlan tharte chuan Zirtawpni khan chief minister Lalduhoma an hmu a. District hrang hranga subordinate police indaih lohna chu 4356 a ni tawh tih thlenin, inthlanpui hun a thlen phei chuan police station-a mipui rawngbawl hna thawktu tur an awm mang lo mai ang tih an hlau a, a rang lama police post ruak hnawhkhah a nih theih nan hma lakpui turin an ngen.
MPSOA thil tum zinga “Service to Others” tih thupui hmanga an sak MPSOA Guest House, CID Complex Bungkawna an din tawh chu police chauh ni lo, civil mi tute pawhin an chawr tangkai hle a, hetiang hi Lunglei district tan din a nih theihnan an hmalakna tawiawm turin CM hi an ngen bawk.
MPSOA chuan Anti-Corruption Bureau (ACB) a deputation posts an neih ve chhun luahkhah loha awm thin chu pawi an tih thu an thlen a. State chhunga corruption dona kawnga hnuchhuitu ber agency- ACB chu thuam chak turin chief minister hi an ngen a ni. Subordinate police-te promotion hun rei tak tak a tangkhang thin chu an dikna chanvo a nih ang ngeia a hun taka tih puitlin zel a nih theih nan thil kal felhlel thin te an sawi a ni.
Chief minister chuan hnuchhuina kawnga pawimawh zual, Cyber Crime Police Station leh corruption chhuitu ber ACB chu thuam chak a ngai hle tih sawiin, sawrkar sum dinhmun hmasawn dan azirin thawktu indaih lohna pawh an ngaihtuah zel tur thu a lo hrilh.