Sudan-a inbeihnain zual lam pan zel

Sudan army leh paramilitary group Rapid Support Forces (RSF) te inbeihna chuan zual lam a pan zel a. Sudan ram hmun hrang hrangah sorkar sipai pahnihte inbeihna hi a thleng a ni,
Mi 100 dawnin nunna an chan phah tawh niin doctors’ union te chuan an sawi a, hliam tuar 1,000 chuang an awm nia sawi a ni bawk a.
Pawl pahnih te chuan capital Khartoum chu an thunun niin an chhal ve ve a, Khartoum khawpuiah hian thil puak ri hriat tur a awm reng a ni.
Pathianni khan hliam tuarte senghawi a nih theih nan hun rei lo te inkahhai puan a ni a, mahse, engtiangin nge inkahhai a awm theih nana inbiakna an neih pawh hriatfiah theih a ni chuang lo.
Khartoum damdawi In dinhmun a duhawm lo hle tiin doctor te chuan an sawi a. Indona hian hliam tuar te enkawlna tur staff leh medical supply te a tikhaihlak vek an ti bawk.
Sudan buaina hi an rama military leader pahnih tena thuneitu zawk nih inchuhnaa an inbeihna kal zel niin thu ringawta an inbeihna chu tharum thawhin a chhunzawm ta a ni.
Sipai hotu pahnih te chu Sudan in civilian rorelna a luh theihna tur chungchangah ngaihdan inang lo an nei a. Sudan hi kum 2019-a authoritarian president Omar al-Bashir paihthlak a nih hnuah sipai thununna hnuaiah a la awm ta char char a ni.
Pathianni khan RSF te chuan capital Khartoum an thunun thu sawiin presidential palace mai bakah a chhehvela khua Omdurman te leh western region Darfur leh merowe Airport hmar lama mite chu an thunun thu an sawi a.
Mahse army te zawk chuan airport an thunun tia sawi niin army te chuan RSF tena khawpuia hmun pawimawh an thunun anga an sawi chu a dik lo an tih thu Reuter chuan a puang bawk.
Sipai pawl pahnih inbeihna hi de facto leader Gen Abdel Fatath al-Burhan leh RSF leader tawrawt Mohamed Hamdan Dagalo, Hemedti ria hriatlarte inbeiha a ni ber a. An buaina ber pawh RSF hnuaia sipai 100,000 te chu army a chhuhluha force thar din chungchangah a ni.
Khartoum khawpui chu a reh hle a, mahse chhang leh nepnawi zawrhna dawr te chu a lun hle thung a, mamawh leh chakkhai lam tumin mi tam tak an intlar a ni.
Sudan hmun dang khawthlang lama Darfur region te ang lo takin Khartoum hian indona leh buaina a hre ngai vak lo va, tun hi Khartoum a cheng tena inbeihna nasa an hriat tum khatna chauh a ni bawk.