Sudan-ah darkar 72 inkahhai puang

Sudan-ah chuan inkahhaina neih theihin a awm ta a, a hmaa tum thum lai inkahhaina siam hlawhchham ang lo takin tun tum chu indo mek pahnih ten an zawm tur thu an sawi.
US Secretary of State Antony Blinken chuan army leh paramilitary Rapid Support Forces te chuan darkar 48 lai inbiakna neih a nih hnuah darkar 72 chhung inkahhaina neih an remtih thu a sawi a.
15 April a Sudan a buaina chhuak avang hian mi 400 chuangin nunna an chan phah tawh a. Sipai pawl pahnih te chuan a hna ve ve in inkahhaina an zawm tur thu an sawi ve ve a ni.
UN Secretary General Antonio Guterres chuan Sudan buaina chuan ‘chhiatna rapthlak tak’ a thlen thei tia sawiin a chhehvel region leh a piah lam thlengin a nghawng na thei hle a ti bawk.
Tharum thawhna intan atangin indona hmunpui capital Khartoum a chengte chu in chhunga tawma pawna chhuak lo tura ngenin an awm a, tui thianghlim leh eitur an tlachham tan tawh tia sawi a ni.
Bomb thlak te chuan infrastructure pawimawh water pipe ang te a tihchhiat avangin mi thenkhatte chuan River Nile tui an in lo thei lo hial a.
Inkahhaina puan mek karah civilian te chuan Khartoum khawpui an chhuahsan theih beisei niin chu hun remchang chu ram dang te pawhin chuhin an mi leh sa te lakchhuah nan hman an tum bawk.
Ram hrang hrangte chuan an diplomats leh chhungte lakchhuah tumin an hman hlel a, chutih laiin misual thenkhat ten rukruk an lo kalpui bawk.
Sudan-ah hian internet tihtawp tluk niin monitoring group NetBlocks te chuan 2% vel chauh a awm an ti a, Khartoum khawpuiah chuan Pathianni zan atang khan internet a awm tawh lo thung.
Sudan buaina avang hian thenawm ramah mi sing chuang an tlanchhe tawh bawk a. Khartoum khawpuiah hian sipai pawl pahnihte inbeihna a nasa ber a ni.
Kum 2021 a sorkar paihthlak atang khan Sudan hi sipai general rual ten an kaihruai a, a hotu lawk pahnih te leh tuna thu zawk nih inchuha intibuai mek te chu armed forces hotu lu ber Gen Abdel Fattah al-Burhan leh a deputy leader RSF hotu ni bawk Gen Mohamed Hamdan Dagalo, Hemedti tia hriat lar te an ni.
Sudan kal zel dan turah leh civilian rorelna hnuaia luh leh dan chungchangah an ngaihdan a inang lo va. An buaina bul bera ngaih chu RSF member 100,000 te Army a hnuhluha sipai pawl thar din tum chungchangah a ni.
Gen Dagalo chuan Gen Burhan sorkar chu ‘radical islamists’ tia puhin amah leh RSF te chuan ‘Sudan mipui te tan kum tam tak an ngiat tawh democracy ram nih ngei theih nan an bei zel dawn’ tiin a sawi.
RSF hotu lawk ber Hemedti thusawi chu RSF te chetlak dan nunrawng tak thin avangin awihsak harsa em em tih a ni a. Chutih laiin Gen burhan chuan civilian rorelna hnuaia luh chu a thlawp thu sawiin mahse elected government hnenah chauh thuneihna a hlan tur thu a sawi thung.