Sum chingpen thubuaiah Court-in KVI CEO hlui thiamloh chantir

Sum chingpen thubuaiah Court-in
KVI CEO hlui thiamloh chantir
Mizoram Khadi & Village Industries Board chief executive officer hlui Lalsawmzuala chu sum tihchingpen thubuai avangin Prevention of Corruption Act Court chuan thiam loh a chantir a. Vawiin – April 11 hian hrem a nih dan tur court-in a puang ang.
KVI Board CEO a nih tawh loh hnu, kum 2010-a FIR thehluh bawhzuina kal zelah Lalsawmzuala hi KVIB hnuaia khuai khawi tihhmasawnna atan sawrkar laipuia Ministry of Agriculture-in cheng nuai 86.63 a pek te, Food Processing Training Centre atan nuai 7.50 a pek leh, Saitual leh a chhehvela fu chingtu chhungkaw 497 loan rulhna atan nuai 147 a ruahman chu, CEO a nih laia hmangkhaw loa puh a ni.
Fu chingtute loan rulhsakna khawih chingpen thua court thutlukna tarlan danin, Saitual leh a chhehvela fu chingtute loan rulhna atana ‘margin money’ an ruahman sak atanga la bang Rs. 9,08,369 chu mamawh tul atan pawhpen a ni tih Lalsawmzuala hian a pha lo. Thuhretute thusawi atanga a lan danin, KVIB thutlukna la loa Maruti Van an lei bakah zanriah kilhona senso atante hman a ni. Maruti Van hi an hralh leh a, hralhna sum hman dan leh dahluhna sawifiah a ni lo. Sum hmanpuk pawh hi rulh leh a ni chuang lo.
Hei vang hian sawrkar miten dan leh kalphungin a tarlan ang niloa dikhlel taka sumpai an tih chingpenna a nih angin thiam loh chantir a ni a; thuhretute thusawia tarlan a nih angin REGP sum nuai 4 leh nuai 5 dangte pawh pawhpen niin, chumi atan chuan CEO a nih angin, bill lem leh lehkha dang lem a siamtir teuh tih court hian a sawi a. Sawrkar lehkha pawimawh tihchingpenna niin thiam loh chantir a ni.
Khuai khawi tanpuina sum tihchingpen thubuaia court thutlukna tarlan danin, heta sum hmanralna atan hian bill lem tamtak siam leh hmuhchhuah a ni a; khaw hrang hranga tanpuina dawng anga tarlan pawh an khawchhung hruaituten thuhretu an nih anga an sawinaah, an veng leh khuaah tanpuina dawng anga tarlan hmingte chu an awm lo tih an sawi a. KVI thawktu pahnihin training pea zinchhuak ang leh an office-a bill la anga tarlan an ni chu a dikloa, an zinchhuak lo tih an sawi. Court hian he thubuaiah hian thiamloh a chantir a ni.
Kum 2008-a Ministry of Food Processing Industry atanga tanpuina sum nuai 7.5 an dawn thu ah, Rs. 88,950 tichingpena puh niin, he thubuaiah hi chuan court hian thuhretu hrang hrangte thusawia tarlan a nih angin, hman khawloh leh eiruk a nih finfiahna a awm loa ngaiin Lalsawmzuala hi thiam a chantir a ni.