Inthlan neih turah an party chuan sum hmachhuan zawng ni lo, a hmang tlem zawnga sawrkar an tum tih Congress president Lalsawta chuan a sawi.
-- Advertisement --
Aizawl District Congress Committee-in kum 2020-a Aizawl Municipal Corporation inthlan leh Local Council inthlana Congress candidate-te intawhkhawm chu Thawhlehni khan a buatsaih a. He hun hmanpuitu MPCC president Lalsawta chuan politics chu tlanchhiatsan theih a ni lo a, mitin min hrut vek avangin ngaihven a ngai tih a sawi. “Politics hi telna tlaka kan ngai lo a nih chuan kan duh lohte awpna hnuaiah kan awm dawn tihna a ni. Chuvangin, politics tha kan neih theihna’n theihtawp kan chhuah a ngai a ni,” a ti.
Central-ah Congress party sawrkar lo mah se, Mizoramah Congress a sawrkar thei tih a sawi. Central-a an sawrkar loh lai pawhin Rajasthan leh Chhatisgarh ah te Congress a sawrkar tho a; Arvind Kejriwal pawh central-a sawrkar miah loin Delhi UT-ah a sawrkar thei a, Mizo Union, PC, MNF te pawh central-a sawrkar loin Mizoramah an sawrkar thei a, central-a sawi tur pakhatmah awm lo ZPM pawhin Mizoramah sawrkar a tum ve tho tih sawiin, “Central-a kan sawrkar loh avanga Mizorama kan sawrkar theih loh chhan tur a awm lo. Party dangten sum ringin sawrkar tum mah se, keini chuan Pathian chakna ringin sum hmang tlem chunga sawrkar kan tum dawn a. Hei hi a theih tih kan hria,” Lalsawta hian a ti.
Mizoram chu taimate leh thawk rimte dinchhuahna rama siam an tum a, a dik lo leh mipui tizawmthaw zawngin ram an hruai dawn lo tih MPCC hruaitu hian sawiin, “Tang puihna hi khawvel ram tinah mihring dinchhuahna bul a ni. Hemi hmang hian thalaite leh eizawnna mumal neilote tan eizawnna ngelnghet buatsaih sak a ni ang,” a ti.