Sum neih ang angin thlai thar kan lei dawn – ZPM leader

ZPM a sawrkar chuan an sum neih ang angin thlai thar an lei nghal dawn tih ZPM leader Lalduhoma chuan a sawi.
East Tuipui bial fangtu Lalduhoma hian Khawbunga vantlang inkhawmah kuthnathawktute tan kumkhatna atangin an che chhuak dawn a, an sum neih ang angin thlai thar an lei tan dawn niin a sawi. “Kan rethei rei lutuk tawh, eizawnna fumfe nei lo, damloh pawha damdawi leina tur nei lo kan tam lutuk; hunpui a lo hnai a, nu leh pa rilru a hah leh tan tawh. Chemkawm technology hmanga kan thawh thiam hmangin eizawnna bul kan tan a ngai,” a ti.
Hma sawn ringawt an tum loa, kan ram politics-ah Pathian ram thleng rawh se, tiin taksa leh thlarau damna an aupui zawk tih a sawi. “Khawvelah hian Pathianin a lal ram din a duh a, tuna kan inenkawl danah chuan mipuiin kan duhthlanna pawh hmang thei loin kan retheihna hmanruaa hmangin min sal bet mek a. Mi thenkhat hian sawrkar mah se, engmah an ni tak tak loang, min ti thin, keini chuan kan danglam bik dawn kan ti a ni,” a ti.
Candidate-ten an sawi ngam loh fo – “ka eiru dawn lo” tih thu chu ZPM candidate zawng zawngin mipui hmaa sawi fo thin turin an inchah a, eirukna lakah pawh an fihlim ngei a beisei tih ZPM leader hian a sawi bawk.