Daily Newspaper

Sunscreen chungchanga hriattur pawimawh

10

Pawn chhuah dawna sunscreen inhnawih taima deuh te chu sunscreen hmang thatchhe deuh te aiin an vun a lang naupang reiin an vun a hrisel duh bik niin zirchianna hrang hrangah an tarlang tawh thin. Suncreen hian ni zung hlauhawm laka kan vun lo venghimtu angin hna a thawk a, chuvangin vun chhe tur vengtu pawimawh tak a ni. Hetih rual hian sunscreen hman dana hriattur pawimawh Dermatologist, Dr Asma Parveen sawi te kan rawn tarlang e.

Tih tur:
Sunscreen chu pawna chhuah hma minute 15-30 ah inhnawih tur a ni. Ni zungin kan vun a chhun hmain vunin sunscreen chu a lo hip hman a ngai a, chuvangin result tha nei tur chuan pawn a chhuah hmaa minute 15-30-ah inhnawih tur.

Sunscreen chu nitin hman tur, nipui, fur leh thlasik lai pawhin ni zung hlauhawm hi a awm reng. Chhum a zing deuh chuai a nih pawhin sunscreen hman tho tur a ni, chhum a zing a nih pawhin ni zung hlauhawm a kal tlang thei tho.

Sunscreen i hman hmain tlem te i vun, i banrek velah khan hnawih chhin phawt la, i huat leh huat loh chian phawt rawh. Hetiang hian sunscreen brand thar i hman dawn chuan ti hmasa phawt zel ang che. I haw deuh a nih chuan hman chhunzawm loh tur a ni.

Tih loh tur:
Sunscreen SPF sang lutuk hman a ngai chuang lo. SPF chu ni zung hlauhawm laka vun vengtu chak zawng ti mai ila. SPF 30 chin chunglam hi Indian ho vun tan a tawk vel a, SPF 30 hian ni zung hlauhawm 97% vel a lo dang thei a, chutihrualin SPF 30 aia a let thum a chak, a let hnih a man to zawk SPF 100 te pawh a awm a, mahse, SPF 100 hian ni zung hlauhawm 99% vel a dang a, SPF 30 nena a man inthlauh dan nen chuan a hnathawh hi chuti takin a tha bik chuang lo.

Sunscreen chu hmaiah chauh hnawih tur a ni lo, i taksa peng hrang hrang a bikin i ban leh kut, nghawng, ke leh beng, ni engin a chhun theih laiah te pawh hnawih vek tur.

Sunscreen chu nikhata vawikhat inhnawih duhtawk mai loh tur, thlan a lo chhuak a nih chuan chu chuan a tireh thei. I awmna hmun a zirin darkar 2 danah hnawih a pawi lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy