Surveyor indaih lohna phuhruk nan private surveyor hman tum

Land Revenue & Settlement department chuan surveyor indaih loh phuhrukna atan empanelled private firm hman tel a tum.
LR&S minister B Lalchhanzova sawi danin, surveyor post ruak 137 awmah post 76 chu hnawh khah loh a ni a. Tunah 15 lak thar tum mek ni mah se, post ruak zawng zawng hnawhkhah theih a nih loh avangin, surveyor indaih loh avanga mipui harsatna tawh phuhru turin private survey firm-te empanel turin hma an la a. Expression of interest an tichhuak tawh a, firm 17-in an chhang.
“Tun atanga rei vak loah chuan private firm hi chhawr tan theih beisei a ni a. Mi harsa zawk, private firm ruai ve thei lote tan sawrkarin surveyor-te service hi a bo dawn chuang lo,” a ti.
State lian thenkhata an tih angin, licensed surveyor neih leh chhawr dan pawh dap mek zel a ni tih a sawi bawk.
Zawhna chhangin L&RS hotute chuan, dan leh dun zawm tur fel tak nei sa in private surveyor hi chhawr tum a ni a. An survey pawh enho leh phawt hnua pawm chauh tur a ni a; pawm vek tur tihna pawh a ni kher chuang lo tih an sawi.
LR&S directorate leh settlement office-in ram teh, ram buai chinfel leh field work hrang hrang an inchan sem avangin directorate hian a hna pui ber – direction, administration leh monitoring a khawih hman thin loh avang leh mipui pawhin mumal zawka an ram record awmna an hriat theih nan Aizawlah settlement office chu North leh South siamin, an chan tur chin pawh fel taka then a ni dawn tih minister B Lalchhanzova hian a sawi a. Kumin October 1 atanga hna tan theih tumin an inruahman tih a sawi.
Zawhna chhangin, office hran hawn turah hian sawrkar sum sen emaw thawktu lak belh ngai lo turin ruahman a ni a. An insuan kualna lama an mamawh tur cheng nuai 10-15 inkar vel erawh fiance changtu chief minister hnenah an sawi thawi tawh tih a sawi a ni.