SUSTAINABLE, INTEGRATED FARMING IN MIZORAM – 5

RK Dawla
Mb 9366095658

1. Khawvel dangte rual ban ve tumin Mizote pawh kawng tinrengah kan tangin, hmachhawp tam tak kan nei a. Chûng zingah chuan, kan ei leh in tur dehchhuahna (farming activities) lam pawh, nasa taka hmasawn kan ngai a. Mihring kan nih chhung chuan, ei leh in tur kan mamawh a. Battery leh Petrol/diesel hmanga nung kan ni miau lova, kan damkhawchhuah nân ei leh in tur thianghlim kan mamawh a ni. Kumina kan article series thupuiah hian Integrated (chi hrang hrang insuihfin) kan dah tel kher a. A chhan tam tak a awm thei ang. A bulpui berah chuan tlo-na (sustainability) kan neih theih nân a ni. Mihringte hi chu kum 100 tling lo daih tura siam kan ni a, kan huan leilung erawh kum sang tam tak daih tura duan a ni thung a. Chhuan tam tak daiha inthlahpung tura duan kan ni zawk a. Chuvangin, kan tu leh fa, kan thlahte lo awm zel tur tân, leilung leh hmunhma rotling kan din a pawimawh êm êm.
2. Tichuan, mihringte hi vaivut (soil) atanga siam kan ni a. Leilung nena kan inzawmna hi thûk tak a ni a. Chuvang chuan, leilung kan tihchhiat chuan kan tuar dawn a. A nihna takah chuan farming practice tam ber hian leilung a tichhia a, mahsela kawng tha zawk kan la hmuhchhuah loh avangin engemaw chen kan kalpui a la ngai rih a. Integrated farming chuan, farming activities hmanga leilung chhe nasa tur kha tam tak kan veng dawn a ni. Entirna mâwl tê han pe ila… Mizoramah hian sangha dil chi hrang hrang hlam 3 bial atanga hectare thlengin kan siam a. A tam ber hi chuan thlur khat chauhin kan kalpui a. Dil kamah sangha chaw tur – changel, fodder grass, buh leh vaimim lam kan la uar meuh lo. Thingtlang kilkhawrah pawh, in hmun tiat lek lek sangha dil kan siam fir fer a, regular taka sangha chawmna tur changel/fodder grass ching tel hmuh tur kan awm mang lo. Dil te reuh tê-a sangha tlêm tê chawm tur pawhin kawr kam chhengchhhe karah changpui hnah kan sât hrâm hrâm fo. A awmzia chu Integrated mindset kan nei lo a ni. Ran vulhtu tam tak pawh kan ni tho. Commercial scale ngawih ngawiha hmunhma chêp tak kara ran vulh ni lêm lo, kan ningnawi ei tura vawk leh ar vulh thinte pawh hian, a velah ram nei duai mah ila, ranchaw tur millets chi hrang chin tel kan uar lo khawp. A nih loh leh, thei huan (fruit trees) siam tam takte leh buh chingtu tam berte hian, kan thlai rah a hlawk theih nân, khuai khawi lam kan ngaihtuah tel lo fo. Integrated mindset hi mamawh tak kan ni!
3. Pawimawh berah chuan kan ni tin nunah hian integrated system hi kan bilh tel a pawimawh a ni. Plastic leh ran zun-êk pollution kan ngah êm êm chhan pawh hi Integrated mindset kan neih loh vang a ni pakhat a. Thil chhia (by-product) hman tangkai tul tihna leh hman tangkai thiamna hi kan ram zîm tê-ah hian kan mamawh khawp mai. tumkhat chu, Greenhouse chhunga an fanghma chin, tha êm êm, a rah sên a insiam puitling thei lova, a tawih zel thu-ah min rawn râwn a. Damdawi a awm an beisei a ni. Mahsela, chutiang a ni lo. Fanghma chu a nu pâr leh a pa pâr nei hrang (cucurbits) a ni a. Khuaiin an bawm pawlh theih loh chuan Vanilla anga kuta pollinate ngai a ni daih! Zingah an Greenhouse kawngkhar hawng thin tura kan inhrilh hnu-ah Fanghma sên a rah puitling thei ta! A thu hrimin, kawng laih te, chemical insecticide hman leh ramhnuaia khuaizu lâk kan uar avangin, ramhnuaia khuaite (natural bee hive) an tlêm telh telh a. Thlai rah chi ching thinte chuan khuai khawi kan intihhmuh a ngai chho dawn niin a lang,kan thlaite a lo rah tam theih nân. A bikin cucurbits chingho zingah. Integrated system tha tak duang chhuak turin tan lâk kan va ngai nasa êm.