Suzuki hotupa Mizoramah rawn kal

Suzuki hotupa Mizoramah rawn kal
Suzuki Motorcycle India Private Limited (SMIPL) Managing Director, Kenichi Umeda chuan a vawi khat nan nimin khan Mizoram a rawn tlawh a, Umeda hian LBS Suzuki buatsaih Sihhmui atanga Bawngkawn thleng Access BS6-in petrol a hman dan inelna Mileage Contest, ‘A Joyful Christmas Ride with Suzuki’ chhimin a vai liam nghal a ni.
Khawvel hmun hrang hrangah kum 27 chuang Suzuki sumdawnna huanga tawn hriat nei tawh Umeda hian kumin April atangin SMIPL Managing Director nihna a chelh tan a, India ram mai bakah ram dang thlenga huang zauh thei turin an beisei.
India-ah hian Suzuki motorcyle zuar chhuaktu dealership 550 an awm a, chung zingah chuan Mizoram dealer LBS Suzuki chu tun kum li vel chhung chu hralh tam pahnihna a ni chho char char a, Mizoram bikah tun kum nga, kum ruk chhungin LBS Suzuki hi two-wheeler hralh tam ber a ni bawk a, chawhrualin thla tin Mizorama two-wheeler hrang hrang hralh chhuah atanga 50% chuang chu Suzuki a ni.
Mizoten Suzuki two-wheeler an ngainat avangin Japanese Umeda chuan Mizorama lo kal ngei a duh phah a. Bawngkawn South YMA Auditorium-ah a pualin inkhawm buatsaih a ni a, an lirthei leitute kawmin an duh dan leh beiseina an neihte hriat a tum a, hei hi Aizawla a lo kal chhan ber pakhat a ni.
India rama Suzuki motorcycle sumdawnna hotupa ber hian Mizoram a rawn tlawh rualin anmahni hamthatna tur piah lamah, khawtlang hmasawn nan engnge an company-in tih theih an neih ve tih hriat a tum nghal bawk.
November ni 29, 2014 khan LBS Suzuki-in Mizoramah lirthei an hralh chhuak tan a, scooter chi thum Access, Burgman leh Avenis bakah motorcycle Gixxer chi hrang hrang, V-Strom leh Suzuki motorcycle lian leh man to an zuar mek bawk. Kum kaw chhunga Mizoram two-wheeler sumdawnnaa hma an sawn dan leh an hnathawh dan avangin Umeda a lawm a, an kal zelna turah duhsakna a hlan nghal a ni.