Swiatek dang zo an awm lo

Swiatek dang zo an awm lo
A zawna a vawithumna leh a career-a a tum lina atan Inrinni zanah Iga Swiatek chuan French Open title a hlawhchhuak leh a, a trophy khawlbawmah grand slam title panga dahtha ve tain, major title dang a sualchhuah chu 2022 US Open kha a ni.
Swiatek hian mipa inelna bika Rafael Nadal-a’n ‘king of clay’ nihna a khum ang deuh khan ‘queen of clay’ nihna a nemngheta ngaih niin, Inrinni zan final-a a khingpui 12th seed Jasmine Paolini lakah harsatna lian tawk loin 6-2, 6-1 hnehna nen a zawnin Roland Garros grand slam tournament bikah match 21 a chak tling chiah a, Open era bikah he khelmuala chakzawn rei palina niin, a tluk loh awmchhunte chu Chris Evert (29), Monica Seles (25) leh Justine Henin (24)-te chauh an ni tawh.
World number one Swiatek hi French Open inbuatsaihna lamah pawh a chetha a, Madrid leh Rome-ah tu ma el rual loha champion-in, WTA title hlu tak pahnih a la a; kumin clay leilung bikah match 19 chakzawn tling tawhin, kum nga chhunga French Open title vawili hawn thei hi ‘queen of clay’ nihna hlan loh ngam a ni lo ang!
Kum 23 mi hi kum 1968 daih tawha professional huanga French Open an leh hnu, Open era an tih chinah Roland Garros-a title pali la thei naupangber a ni.
Suzanne Lenglen cup a chawi hnua thu a sawiah Pole nu tereuhte chuan, “He hmuna ka lo ding leh hi a mak a ni. He hmunhma hi ka ngaina a, kumtin mai hian he hmuna kirleh thuai thuai chak hian ka van ruai thin.
“Second round-ah khan ka tla thelh a, min auhphur hram hramnaah khan ka lawm a, ka tan chuan hnuk tiulh teuh thei tournament a ni,” a ti.
French Open singles leh doubles lama final lut ve ve thei khawpa chetha Italian nula hleitling zuah ni bik lo Paolini lawmpuina hlan nghalin, Pathiannia double final a khelh zui leh tur atan duhsakna a hlan tel bawk.
Second round-ah khan world number one hlui Naomi Osaka lakah Swiatek hian harsatna tawkin, a talbuai laih hman a, mahse, insiamthain top seed a damkhawchhuak hram a; a hnu lamah erawh a tluang zui ta purh a ni.
Fourth round-ah minute 40 chhungin Anastasia Potapova a hnawtchhuak a; quarter-final lamah game hnih chiah hloh chungin 2019 finalist Marketa Vondrousova a hneh a; semi-final match-ah US Open champion Coco Gauff chu han tang na deuh thei dawn mah se tunhma lama a lo sawp tawh thin ang bawkin a hmetmit zui leh ta a ni.
Final-ah khan mi thenkhat chuan a tumpui hraw pui pui barakhaih thin Paolini khan Swiatek lakah harsatna a thlen theih mai an beisei hman a; an han inkhel a, bul tan tha tawk lo mah se reiloteah a tawlhpanal thleng leh nghalin, khelmual sen chungah Poland nula kha a thlun phelh ang zar zarin a inlan zui thuai a, Italian nula hang ngaihno ber tan beisei tur a awm zui lo!
Paolini hi Open era chinah Francesca Schiavone leh Sara Errani tih loha Italian hmeichhe zinga Roland Garros final lut leh thei hmasaber niin, grand slam title lakna hun tha a neihah tunlaia hmeichhe tennis player tawhkhirh ber ni mek a hmachhawn miau a, amah pawhin hnehna a chan zawh loh hnuah Swiatek lam hawiin, “He hmuna nang hmachhawn hi he sport-a chona lian berah ka ngai,” a ti.
Italian chuan sawizawmin, “He hmunah hian kum 15 emaw a aia rei ka lo inlan ve tawh a, tun hi ka hringnuna hun tha ber a ni. Ka hun a la tawp lo a, naktuk hian doubles final khelh tur ka la nei.
“He ni 15 chhung hi a hautak kher mai a, chutih rualin ka hlim takzet a, he hmun min thlentirtu ka team-te ka chhuang a, vawiin kha khirh teh mah se keimah pawh hi ka inchhuang a ni,” a ti.
Statistics thlir zui thuak thuak ila.
Swiatek kha a zawnin French Open-ah match 21 a chak tling chiah a, Open era-ah he clay-court tournament women’s singles bika chakzawn rei palina a ni.
Chris Evert (7) leh Steffi Graf (6)-te chu Pole aia French Open title la tam awmchhun niin, vawili bawk champion ve tawh Justine Henin nen an intluk.
Kum 2021 hnu lamah Swiatek hi Paris-ah hian a la tlawm leh ta mia lo a, Roland Garros-a match 37 a khelh tawhah vawi 35 a chak tling.