Bank tal buai Credit Suisse chu a elpui ber Swiss bank UBS te chuan sorkar thlawp inremna siamin an chhanchhuak.
Switzerland-ah bank pahnih te hian karkhat inbiakna an neih hnuah inremna an siam thei tiin Switzerland financial regulators te chuan an sawi a.
Swiss National Bank te chuan financial market confidence tihngheh nan leh economy tana pawi thei tur chinfel nana tihmakmawh tiin an sawi a.
Credit Suisse chuan ruahmanna an siam thar chuan an client service ah engmah tihbuai emaw harsatna a siam dawn lo tiin an sawi.
“Kan client leh customer te tan engmah harsatna leh buaina tur a awm reng reng lo,” tiin bank te chuan an sawi a.
Credit Suisse shareholder te chu inremna an siamah vote an neih ve phalsak an ni lo va, mahse UBS ah share 22.48 an neih zelah share khat zel dawng thungin bank hlutna hi $ 3.15 billion vel anga chhutsak an ni.
Thuchhuah a siamah Switzerland central bank chuan ‘Tun hun danglam takah hian financial stability a awm theih nan leh Swiss economy humhim nan inremna siam a ni’ tiin a sawi.
Federal government chuan UBS tena inremna siama hloh an neih palh hlauh a awm theiha chhawmdawlna $9.6 billion pe thei turin inremna siamin an tiam thu an sawi bawk a. Hei mai bakah hian Swiss central bank chuan liquidity assitance $110 billion thlenga an pek theih tur thu an sawi bawk a. Global financial institution te chuan inremna siam chu an fak hle a ni.
Bank of England pawhin Swiss thuneitute chetlak dan chu a fak takzet thu a sawi a. “Ram danga kan thawhpuite nen thil awm dan kan thlithlai reng a, thlawp theihna awm ang angah kan thlawp dawn a ni,” tiin thuchhuah siamin an sawi a. UK banking system chuan ‘sum a ngah tawk a, a him a ni’ an ti bawk.
US Treasury pawhin bank pahnih insuihzawm chu lawmawm an tih thu an sawi bawk a, British sorkar pawhin Financial Conduct Authority (FCA) leh Bank of England te nen inbiakpawhna an neih reng thu a sawi bawk.
FCA te chuan bank pahnih inzawm chu lawmawm an tih thu sawiin a chhan chu UBS leh Credit Suisse te chuan London-ah hmun an neih ve ve thu a sawi bawk.
Christine Lagarde, President of the European Central Bank chuan Swiss thuneitute chetlak dan chu a fak takzet thu a sawi zui bawk a. “Market dinhmun a mumala financial stability a awm theih nana an hmalakna hi a fakawm takzet,” tiin a sawi a, “Euro area banking sector te an ngelnghet a, capital leh liquidity a ngah tawk a ni,” tiin a sawi bawk.
US Treasury Secretary Janet Yellen leh Federal Reserve Board chairman Jerome Powell te pawhin Swiss thuneitu tena ‘financial stability’ awm theih nana an hmalakna chu fakawm takzet an tih thu an sawi a. “US banking system capital leh liquidity dinhmun a ngelnghet a, US financial system chu a rinawm tawk a ni,” an ti zui bawk.
Inremna siam a nih hnuah Swiss capital Bern-ah UBS chairman Colm Kelleher chuan Credit Suisse chu ”ro hlu tak kawl reng kan tum” tiin a sawi a. “UBS shareholder te tan pawha tha a ni a, Credit Suisse tan pawh emergency thila inchhanchhuahna a ni,” tiin a sawi bawk.
Kum 167 laia upa ni tawh Credit Suisse bank hian tun hnaiah harsatna nasa tak tawkin tlachhe thei mai dinhmuna a ding tawh chu chhanchhuahin a awm ta a ni.
-- Advertisement --
Bank te talbuai?
US president meuhin mipuite hnenah in sum a him a nia tia a hrilha a puan meuh chuan sorkar chuan sum lama buaina nasa tak a ngai thutak hle tihna a ni.
Joe Biden chuan tun hnaia US bank pahnih te an tlukchhiat hnuah mipuite chuan sum dah te a him thu a hrilh a. Mahse, US chauh nghawng a ni lo, tun hnaiah khawvel hmun hrang hranga bank te chuan harsatna an tawk nasa a ni.
Khawvel hmun hrang hranga bank harsatna tawk chuan a nghawng ve dawn che em?
Bank-in eng nge a tawh a, eng vangin nge an tlakchhiat?
March ni 10 hnu khan US bank pahnih – Silicon Valley Bank (SVB) leh Signature Bank te chu an tlachhia a, kum 2008-a global financial crisis thlen hnua bank hlawhchhamna lian ber a la ni.
Heng bank pahnihte hi sumdawng tena an hman rim leh technology industry te nena invialchiat an ni a, tun hnaiah crypto currency hlutna tlahniam vak leh investor tena rinna an hlohna chuan harsatna a siam belha ngaih a ni.
US-a bank lian ber 16-na SVB tena sum an mamawh neih belh tuma chet an lak hnuah customer te phili buaiin an deposit te an lachhuak vak a. Darkar 48 pawh tling lo chhungin bank sum quarter khat dawn chu an la chhuak hman der a ni.
He mi hnu hian regulator te chuan bank pahniha deposits tin te chu a him biai tiin an tiam zui a, a hma lawkin crypto-specialist Silvetgate bank te chu an lo talbuai tawh bawk a.
“Hri ang maia inkaichhawn anga thil a kal kan hlau a, chu chuan customer tena sum an lak chhuah vak vaka bank dang dang te pawh nghawng kual vek thei a ni” tiin US Treasury Secretary Janet Yellen chuan a sawi.
Bank dang te an tlachhe dawn em?
Bank atanga customer tena sum an lak chhuah vak vak hi bank run tia sawi niin hripui leng ang maia mipui hlauthawng philiin an deposit te an lakchhuah vak vak hlauhna a lian hle.
US-ah chuan medium-sized bank te share chu a tlahniam chak hle tih an hria a, investor te chuan an small business leh customer hausa te chuan an sum thahnem tak tak dah te chu bank lian leh him zawka an ngaihah an sawn an hlau hle a ni.
Bank lian te chu ngelnghet zawka ngaih an ni a, a chhan ber pawh customer an ngah a, mipui thahnem tak market news ngaihsak lem lo an tam bawk a, an savings te pawh $ 25,000 limit hnuai lam a ni hlawm bawk.
S&P Global Ratings-a analysts te chuan US-a mipui tena sum an lakchhuah vak vak chu chuti taka la hlauhawm pha lo an ti thung a, mahse, fimkhur thuah US central bank te chuan bank hrang hrangte hnenah an fund tihphuisui nan emergency-in sum an pek belh thung a. Europe ah pawh bank lian turu Credit Suisse kum tam tak harsatna tawk tawh chu Swiss central bank chuan 45 billion pound emergency fund a lo pe tawh bawk.
Eng vangin nge bank an tlakchhiat?
Bank hrang hrang tena harsatna an tawhna chhan bera ngaih chu tun hnai kum chhova borrowing cost sang lutuk vang nia puh a ni.
Khawvel hmun hrang hranga central bank te chuan economy tihngelngheh nan interest rate an tihniam a, chu chu thil man sang lutuk an venna pakhat a ni.
Interest rate tihsan hian SVB te ang chu a khawih na thung a, an start-up customer te tan sum puk a tiharsa ta thung a, chuvang chuan chung mite chuan an sum neih te chu rang tak takin an lakchhuah loh theih loh phah a ni.
Interest rate tihsan chuan long-term bond investment hlutna pawh nasa tak khawih danglamin chu chuan harsatna a siam bawk a.
Hei vang hian US-ah bik pawh bank te chuan hloh $ 620 billion vel nei thei reng anga ngaih a ni a.
Mahse, US bank hrang hrangte chuan an bond te chu an humhim thei a nih chuan chu chuan harsatna a thlen dawn lo va, mahse, rang takin sum siam tum mah se an theih dawn loh phah thung a ni.