System dika kal…

Nimina BJP Mizoram huaihawt “Intellectual Meet”-a thusawitu Prof Dr. James LT Thanga, MZU chuan India ramah hmasawnna hrang hrang neih theih nana game changer lian bera a ngaih chu ‘system dika kal’ a nih thu a sawi a. System dika kan kal hian hmasawnna a lo thleng thin a ni, a ti.
India ram pum dinhmun chu dah tha in, Mizoram dinhmunah he zawhna, “Kan kalphung hi eng ‘system’ nge? tih hi han inzawt ta i la.
Khawvel awm reng ta na na na chu eng tin tin emaw ni hi chuan hma lam hi kan pan ve chhet chhet zel a, mahse hma kan sawn dan tur angin hmasawnna hi chu a kal chak lo tih kan hre theuh awm e. Chuti a nih chuan, kan kal dan system hi chu a dik lo tihna a ni ang a; hma kan sawn chak lo hle a nih phei chuan, ‘kan kal dan system hi a dik lo nasa hle’ tihna ni thei bawk ang.
System tih ringawt hi chuan a huam zau thei hle ang a; sawrkar, kohhran, khawtlang, pawl, chhungkua leh mimal a huam vek thei ang. Mahse, hmasawnna han tih hian, a khaikhawmtu ber ‘sawrkar’ hi kan tinzawn lo thei lova, chuvangin sawrkar kal dan system hi system dik a ni em tih hi kan thlurbing deuh tur chu a ni.
Sawi tur a tam awm e, sawi vek sen a ni lo ang. Thil pakhat langsar tak a awm a, chu chu sawrkar apiangin an policy tihlawhtling tura an flagship programmes an kalpui dan hi a ni.
Kan hria a, kan hmu vek. Eng sawrkar pawh piang se, policy tha tak tak nei vek an ni. Ei leh bara intodelh tura flagship programme pawh nei vek an ni. Mahse, eng vanga tun thlenga hlawhtling thei lo nge an nih?
A chhan chu, an policy tihhlawhtlin tak tak aiin, inthlan leh huna an tlin leh theih dan tur ngaihtuahna ‘election oriented’ ringawt an buaipui zui thin vang a ni ber. Chumi awmzia chu, system dik lo kawng an zawh tihna a ni.
System dik chu eng nge? System dik chu— eng sawrkar pawhin sawrkar hmasate hnathawh an chhunzawm ngei ngei tur hnutchhiah thei tur khawpa hna thawh a ni.
Mizoram mipui chaw rinpui ber chu buh a ni. Leileta siam theih ram awl zau tak Mizoramin a nei tih sawi hluam hluam thin ram hruaitute hian, sawrkar dangin an chhunzawm ngei ngei ngai turin leilet tur lo nawr hek hiam huam thin se, tractor, bulldozer, excavator etc lo hung ngir khep khup thin se, tu nge chhunzawm lo ngam ang? Chu chu system dik a ni. Mahse, chu chu kan kalpui tlat si lo a ni. Thil dang pawh sawi tur tam tak a awm ang.