T20 – India in Ireland an sawp

T20 World Cup khelh mekah India chuan an match hmasa berah Ireland an sawp a, awlsam takin hnehna an chang. Inkhel dangah South Africa in tha zetin bul an tan ve bawk.
Champion tura rinkai India hian Nassau County International Cricket Stadium, New York-ah Ireland an hmachhawn. Ireland hian an vaw hmasa a, over 16-ah run 96 chauh an siam a, an out fai vek. Targer khum harsa lo tura ngaih India in an um a, rinlawk ang ngeiin an umphak thuai. India hian over 12.2-ah an mamawh run an vawchhuak a, pahnih chiah out in, awlsam fahranin hnehna an chang.
India tan hian Rohit Sharma chuan run 52 a siam hman a, a out lo va, Rishabh Pant pawhin out lovin run 32 a siam ve bawk. India tan half century siam hman Rohit hian T20 international-ah India tan run 4000 a siam tling tawh a, World Cup-ah run 1000 a siam tling tawh bawk. India hian pathinni hian an elpui lian Pakistan an hmachhawn zui leh ang.
India in tha taka bul an tan lai hian an thenawm ram Sri Lanka erawh chuan chhe takin bul an tan ve thung a, an khingpui South Africa lakah an tlawm chiang hle. An khingpuite lakah hian run 77 chiah an siam thei a, hei hi T20-ah run an siam tlem ber tum a ni.