Zverev hmachhawn tur Casper Ruud

French Open 2024 khelh mek niin a hmawrbawk a hnai a, mipa semi-final a intum tur a hriat kim tawh. Mipa semi-final hnuhnung berah Alexander Zverev chuan Alex de Minaur lakah set hloh lovin hnehna a chang a, Casper Ruud hmachhawn turin semi-final a lut.
Germany Tennis star lar Alexander Zverev hian quarter-final-a a khingpui Australian 11th seed Alex de Minaur lakah bul a tan tha a, break a neih chhawr tangkaiin set khatna a la. Set hnihnaah an inhnehtawk zui viau a, tie-break khelh a ngai. Tie-break-ah Olympic champion Zverev a chungnung zui leh a, set a la nawn leh. Set hnih a lak zawn hnuin inrintawkna sang zawk nen a inlan chhunzawm a, set thumnaah break nei zui lehin, set a la zui leh a, 6-4 7-6 (7-5) 6-4 a hnehna changin semi-final a lut.
French Open-ah a zawna semi-final vawi li ngawt lut zawn Zverev hian khelh hah ngai lova semi-final lut Casper Ruud a hmachhawn zui leh dawn. Ruud hi kum 2022 leh 2023-ah final a lut zawn tawh a, Rafael Nadal leh Novak Djokovic hneh lovin final-ah a vanduai ve ve. Djokovic nen quarter-final-a inhmachhawn tur an nih laiin chamnpion lai Djokovic a inhnukdawk a, hahdam takin Ruud hian semi-final a lut.
Zverev leh Ruud te hi French Open 2023 semi-final-ah an lo inhmachhawn tawh a, Ruud hian 6-3 6-4 6-0 ngawta hnehna changin final a lut. Zeverev hian kum hmasa lama a tlawm tawhna phuba lain hnehna chan ngei a tum ang. Anni pahnih hi vawi li an inhmachhawn tawh a, vawi 2 ve ve chakin, chugnung zawk an awm lo. An intumna hmasa pahnihah Zverev a chak ve ve a. An intum hnuhnung pahnihah Ruud a chak ve ve thung.