Tamannaah Bhatia-i’n minute 6-ah vbc 6 a hlawh!

South Indian cinema atanga Bollywood thlenga tal kual thei Tamannaah Bhatia hian lam a thiam riau a, chu chu a hming a chherna pakhat pawh a ni. Jailer film-a ‘Kaavaalaa’ hlaa a lam te, ‘Stree 2’ film a ‘Aaj Ki Raat’ hla te, The Bads of Bollywood a Ghafoor hlaa a inthehthil vel te chu a acting ai mahin a larpui zawk e an tia lawm.
Tichuan le, December ni 31, 2025 khan Goa-a kumhlui thlahna event pakhatah lam turin an sawm a, chuta a lamna video pawh social media lamah a darh chak hle a, mahse, hemi tuma ngaihven a hlawhna chhan ber chu stage-a minute 6 a lam manah lawmman cheng vaibelchhe 6 a inchhiar niin an tarlang.
He New Year event hi Baga Beach, Goa-a Las Olas Beach Club-ah neih a ni a, Tamannaah hi Punjabi star Sonam Bajwa nen stage-ah an che dun a, Aaj Ki Raat hlaah stage-ah a lam zak zak a, a lamthiamna chu social media lama fak zuitu pawh an tam.
Hetihrual hian media report hrang hrangah stage-a minute 6 a lam manah Tamannaah hian lawmman cheng vaibelchhe 6 a dawng niin an tarlang a, minute khatah cheng vaibelchhe khat hlawh ang a ni. He lawmman chungchang hi Tamannaah leh a team lam chuan official-in engmah an puang lo a, report hrang hrang hi a dik loh thu pawh an puang chuang lo. An ngawih zui tlat avangin minute 6 chhungin vaibelchhe 6 hi a hlawh ngei tih a chiang niin an tarlang zui ta zel zawk a ni.