Khawvawtin US tuam mek

Americans maktaduai 60 chuang te chu khawvawt turu tak in nuai mekin hei hian kum tam tak hnua vur sur nasat ber mai bakah khawvawh ber a thlen dawn tiin khawchin thlirmite chuan an sawi a.
Weather alert hnuaiah Canada ram pum deuhthaw leh US state 30 Kansas atanga East Coast thlengin an awm a. Ohio atanga Washington DC thlengin vur 6-12 in (15-30cm) vel tla tura ngaih a ni.
Kentucky, Virginia, West Virginia, Kansas, Arkansas leh Missouri ah te chuan state of emergency puan a ni a. Florida ah pawh khua vawt hle tura ngaih a ni bawk.
Forecaster te chuan extreme weather hi Artic a thli vawt tleh polar vortex in a siam niin an sawi.
Thli vawt hian Central Plains a tuam hnuah US East Coast a tuam leh tan a, New York khawpui angah te chuan vur 3ft lai a tla tawh a ni.
Washington DC ah chuan vur 5-9in a chhah vel a sur tura ngaih niin city mayor chuan snow emergency a puang nghe nghe a ni.
Congress chuan Donald Trump an thla thum kaltaa US presidential election a chakna a chan nemnghehna nei tur an ni a, mahse, khawchin duhawmlo tak avang hian lawmaker thenkhat te an constitutency atangin an let thei ang em hriat a ni lo.
Baltimore, Maryland a Annapolis area ah pawh vur 8-12in vel a chhah a tlak beisei a ni a. Kansas, Missouri leh nebraska ah te chuan Blizzard warning tihchhuah a ni bawk a. Missiouri hmarlamah chuan vur sur 14in lai dawng tawhin Kansas pawhin 10in vel a dawng tawh bawk.
“Heng lai region a vur tla te hi kum sawm tam hua helai bial velin vur a dawn nasat ber a la ni” tiin NWS te chuan an sawi a. “Kum 2011 hnua US in January thla vawt ber a tawng thei dawn” tiin AccuWeather forecaster Dan DePodwin chuan a sawi a.
Vur tla nasa avang hian zin veivahna lamah harstana namenlo siamin US a thlawhna thlawk lut leh chhuak tur 1,500 vel cancel ni tawhin 5,000 chuang tihkhawtlaiin a awm mek tiin FlightAware.com chuan a tarlang bawk.
Amtrak te pawhin train service tam tak an kaltir thei lo bawk a. American, Delta, Southwest leh Uited Airlines te pawhin thlawhna thlawh theih dan a mumal loh em avangin an fee lak te pawh passenger te an pelet leh a ni.
Hmar lamah Canada pawhin polar vortex tuar hle in Canada ram pum deuhthaw chu extreme weather alerts hnuaiah a awm mek bawk a.
Canada hmun thenkhatah chuan snow qualls- vur tla nasa tak leh thli vawt inbelhbawm a thleng mek bawk a. Manitoba central province ah chuan temperature -40C ah a tlahniam hial a ni.