Tamil Nadu-in Governor an tei thei lo zel

Tamil Nadu Legislative Assembly chuan Thawhtanni khan Chief Minister M.K. Stalin-an Union Government leh president Droupadi Murmu te chu Assembly-in Bill a passed tawhte pawmpui mai tura thupek pe tura tihna resolution chu an pawm a.
Chief Mnister M.K. Stalin chuan Governor laka resolution pahnihna kalpui lo thei lova siam a nih thu a sawi a. Chutianga thil duhawm lo tak chu a sorkar siam a ni lo tiin a sawi bawk a. Governor chu politics thila chet laah puhin “Raj Bhavan chu Political Bhavan-ah a let,” tiin a sawi bawk a. Justice Rajmannar Committee thlirna sawi langin “Governor post hi nuai bo a hun tawh a, Governor chu thlawn a ngai tawh a ni,” a ti.
Kumin January thla khan Assembly chuan Governor-in a thusawi tura ruahman saka a duh lai lai chauh a sawi chhuah chu an duhlohna resolution an lo siam tawh a.
Kar kalta lawk April 7 khan Governor R.N. Ravi chuan Governor-in Assembly-in Bill a passed te remtihna a pe duh lo a nih chuan “Bill chu a thi a ni” tiin a sawi.
Stalin-an resolution a kalpui hmain Water Resources Minister Duraimurugan, Leader of the House chuan resolution kalpui a nih theih nan rules thenkhatte chu hman theih loha dah zuaiin Governor laka resolution sawihona hun siam a ni a.
Opposition party lian ber AIADMK te chuan resolution kalpui hma hauhin Speaker M. Appavu chuan Deputy leader of the Opposition pawm tura an tihna a pawm lo tiin House an chhuahsan thung a. Leader of Opposition Edappi K. Palaniswami pawhin Assembly rorel inkhawm live telecast-ah Opposition leader te thusawi lai tihchhuah a ni lo va, State Minister tena an chhanna erawh kimchang taka tihchhuah a ni tiin a sawi bawk.
Resolution pawm a nih theih nan House-a member hmun lia thena hmun thumin an pawm a ngaih avangin Tamil Nadu Speaker M. Appavu chuan Rule 287 of the Assembly Rules behchhanin Assembly kawngka chu vote lak laia khar turin a ti bawk a. Member awm 146 zinga 144-in resolution chu an pawm a, BJP MLA pahnih M.R.l Gandhi leh C. Saraswathi te chauhin an hnawl a, House an chhuahsan bawk.
Resolution tum ber a sawifiahnaah Chief Minister chuan Tamil Nadu Legislative Assembly-in legislative power a neih tundinna a ti a, Governor chu Tamil Nadu mipuite duhdan kalha chet la zui zel lo tur leh principle of democracy namnula Legislative Assembly sovereignty dah hniam lo turin a ngen bawk.
Stalin chuan Union Government leh President te chu Governor-in legislator tena Bill an passed pawh remtihna an pek theih hun bituk siam turin a ngen bawk a. Sorkar lai mek Tamil Nadu mipui tena duh taka an thlante chuan constitution-in a phut ang leh democratic taka mipuite enkawl nana an thuneihna an hman remtih a ngai tiin a sawi a.
Govenor hian he house zahawm takin thutlukna siama Bill a pawm te chu zahpahna nei hauh livin leh State mipuite thatna tur ngaihtuah miah lovin remtihna a pe duh lo zel a ni, tiin a sawi.
Chief Minister chuan tun hnaia Governor-in Bill a hnena pawm tura an thawn a pawm mai loh chungchanga a thusawi te chu sawi lang bawkin, Governor chuan a office luah leh thutiam a neih te mil lovin chet a la a ni, a ti bawk a.
“Governor chet lak dan hi Constitution kalh niin convention awmsa te kalh a ni a, chu mai bakah House ngainep leh namnulin Parliamentary democracy a Legislature chungnunna a namnul a ni,” tiin a sawi bawk.
Speaker Appavu chuan voice vote lak a nih hnuah resolution chu pawm a nih thu a puang zui a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More