‘Tan’ la te nuai 2 leh a aia tamin pui dawn

hhuah tuma tan la te chu cheng nuai hnih emaw a aia tamin emaw an pui dawn tih Congress thupuangtu Dr Lallianchhunga chuan a sawi.
Ningania Champhaia thuthar thehdarhtute a kawmnaah Dr Lallianchhunga chuan Congress party manifesto no.1 chu ‘Tang Puihna’ a ni a. Hemi hnuaiah hian kawng tinrenga dinchhuah tuma ‘tan latute’ chu sawrkarin cheng nuai hnih emaw a aia tam pawhin a pui dawn a. Mi taima leh thawkrimte dinchhuah tir chu he ‘tang puihna’ in a tum ber a ni tih a sawi.
“Congress party hi a thutiamah a din thin avangin mipui fairel bel thleng phak ngei tura ‘tang puihna’ hi tihhlawhtlin a nih theihnan Congress candidate-te mipuiin kan vote tlin a ngai a ni,” a ti.
Tang puihna chu sem policy a ni lo tih sawiin, “”A mamawh tak takte chauh tanpui an ni anga, a mamawh lote hnenah pek a ni ve dawn lo,” Dr Lallianchhunga hian a ti a. Congress party-in an ti ang an tih chu Pathian leh mipui zarah tihlawhtling theia an awm chuan an tihhlawhtlin mai thin avangin, kumin inthlanah sawrkarna an siam a nih chuan chhungkaw tin, mimal tinin nasa takin hma kan sawn ngei dawn a, ‘tang puihna’ hian Mizoram hmel a tha zawngin a tidanglam vek dawn tiin a sawi.
‘Tang puihna’ chu mimal, dinchhuah tuma tan la te puihna a awm thei dawn a. Lehkha zir chunga mahni intodelh tuma tan latute pawh sawrkarin a tanpui dawn tih a sawi. A intawm chi, hnathawktuten district/ constituency/ block level, khua leh veng, society/ association /Zau ang zawnga an mamawh intawm chi ah puih theih an ni bawk tih a sawi a. Hei hi Congress sawrkar hmasaah pawh NEDP hnuaiah an lo kalpui tawh tih a sawi a ni.
Tang thei te an pui phawt anga, tang ve thei lo te tan pawh ruahmanna siam a ni tih Congress thupuangtu hian a sawi bawk.