Tang tlanchhuak pakhat man

Chhiahtlang dai, Serchhip District Jail atanga tlanchhuak mi pahnih zinga pakhat zawk chu Pathianni zan khan Serchhip bul Vanchengte ramah man a ni.
July 6 tlai khan Serchhip District Jail atang hian mi pahnih – Lalchhanhima (44) Leisen Myanmar leh Lalnunnema (31) Thantlang Myanmar chu an tlanchhuak a, an ni hi silaimi tawlhruk tum chungchangah Serchhipa man, an thubuai ngaituah lai mek an ni.
Serchhip Police chuan a zawn hna an thawh nghal bakah hmun hrang hrangah an hriattir a. Pakhat zawk Lalnunnema hi Pathianni tlai khan Vanchengte khaw bul leipuiah hmuh a ni.
Thudawn danin, Vanchengte hian kuminah an khaw bul maiah leipui an nei a, sawhthing an ching ber. An thil chin en paha vak khawthawng Zodinpuia chuan ‘bekte’ a mi pakhat lo awm chu a va tawng a, jail tang tlanchhuak a ni tih hre nghal mah se, a hre lo der a, tang tlanchhuak zawk hi a insawi nghal a, tanpui dilin, phone hmanhawh a dil bakah chaw a dil a ni. A mamawh hi ngaihtuah sak tiamin a hawsan a, ti tlangthang loin khawtlang hruaitute a hrilh a; chaw hi kensakin, a pek laia man turin ruahmanna siam a ni.
Lalnunnema hi innghahna tura an ruatah lo awm mai bik loin Zodinpuia hi ralkhat atangin a lo thlithlai ru ve reng a; him nia a hriatah thawm a chhuah chauh a, a chaw ken a ei laiin thawm an hria a, chaw pawh ei zo hman loin inthiarfihlim a tum a, Zodinpuia hian chelh beh tum mah se, amah aia lian zawk a nih avangin tharumah a hneh loa, a tlanchhe hman ta tih sawi a ni.
A tlanchhiatna lam hi kham deuh vek a nih avangin police lo thlen an nghak a, police-te hian umzuiin feet 30 vela sanga tlaa hliam tuara a lo mu reng chu an zuk hmu ta nia sawi a ni.
A hmunah hian bawihsawm nghal niin, Thawhtanni zing khan Serchhip thlenpui a ni a; medical check-up tih a ni. A tlan chhuahpui pa Lalchhanhima (44) erawh he chanchin ziah lai thleng hian a chin hriat zui a ni loa, chhuizui zel a ni.