Tanhrila tui lakna hmun tlawh

Tanhrila tui lakna hmun tlawh
State Investment Programme Management & Implementation Unit (SIPMIU) hnuaia hmalakna, Aizawl khawpui chawm tur Setlak Tanhrila tui litre maktaduai 37 sawngbawl theihna hmun siam chu Ningani zing khan UD&PA minister K Sapdanga leh PHE minister Prof. Lalnilawma ten tlawhin, department hotuten an lo dawngsawng.
UD&PA minister chuan tui chu mitin mamawh a nih bakah mihring hriselna thui tak innghahna a nih avangin PHED kaltlangin mipuiin tui thianghlim leh hnianghnar an dawn a pawimawh a. Chutih rual chuan, tui renchem nachang inzirtir tel a tul tih a sawi.
PHE minister pawhin kumin fur ruahtui tlak tam avangin Tlawng tui lianin Water Treatment Plant-a tui hip luhna ‘intake well motor’ a chim chhia a, tunah siamthat ni tawhin vawiin – December 20 hian enchhin tum a ni tih a sawi. Leimin leh lei tlahniam vanga pipe chhia leh tui put awm theihna hmun endik mek a ni, tiin, tui pump hna kalpui chhunzawm thuai a nih theihnan thawktute chu hna tha taka kalpui turin a chah bawk.
Water Treatment Plant, Setlak Tanhril hi ni khatah darkar 23 hna thawk thei tur leh tui litre maktaduai 37 pump thei tura ruahman niin, Laipuitlanga main reservior-ah tui an pump chho dawn a ni.