Tariff vangin India-in US ralthuam lei tum thulh?

Tariff vangin India-in US ralthuam lei tum thulh?
India chuan President Donald Trump-a’n tariff sang tak lak a tum avangin US atanga ralthuam leh thlawhna thar lei a tumna a titawp dawn nia sawi a awm a, hei hi news agency Reuters chuan Indian thuneitu sang pathum sawi a tichhuak.
Hemi chungchang hria pahnih chuan Reuters hnenah hian India chuan Defence Minister Rajnath Singh-a chu Washington-a zina thil lei tur puang tur a ni a; mahse, zin tur hi a thulh tih an hrilh a ni.
Hei hian Indian sorkar chuan defence ministry kaihhnawih thuthar chu ‘phuahchawp leh dik lo’ tiih a sawi a. Ralthuam lei tumna chu ‘ruahman angin’ kalpui mek zel a ni tih a sawi.
Trump-a’n Nilaini kal taa New Delhi-in Russian tuialhthei leia Russia-in Ukraine a rûn meka puitu nia sawia a hnua Indian bungrua an lak luhah tariff 25% lak belh a tum atangin ram pahnih inkar hi a tha vak lo.
Chhiah lak belh tur nen hian India-in thil a thawn chhuah atanga tariff a lak chu 50% a ni dawn ta a, US-in a sumdawnpui ram zinga chhiah a laksak tam ber zinga mi a ni dawn.
Trump-a hian tariff sang laksak tur a puan tawh, a taka kalpui loh a awm nual avangin India pawh hian Washington hi a dawr zui mek zel a. Indian thuneitu pakhat chuan tariff lak zat tur a chian hun leh inremna a awm hnuah ram venhimna thil lei tum hi kaltlangpui a ni ang tih Reuters a hrilh a; mahse, hei hi ‘tun hnaia thleng tura beisei a ni lo’ tih a sawi bawk.
Thuneitu pakhat chuan ziaka thil leitur tihtawpna thupek a la awm lo va; mahse, hma lan panpuina pawh a awm rih lo niin a sawi.
US nena inkawmngeih tak, New Delhi chuan Washington leh Europe-a a thawhpui ramten Moscow nena an insumdawn tawn reng laia India bitum bik a ni chu a dik lo tih a sawi tawh.
Reuters chuan India-in General Dynamics Land Systems siam Stryker combat vehicle leh Raytheon leh Lockheed Martin duan Javelin antitank missile te lei tuma ruahmanna kal mek chu tariff avang hian engtia kalpui zel tur nge tih a ngaihtuah mek niin a tar lang.
Trump leh Indian Prime Minister Narendra Modi-a chuan February khan ralthuam inleisakna tur hi duangin siam dun pawh tha an lo ti tawh.
Indian thuneitu sang pahnihte chuan Singh-a hi a zin hunah Indian Navy hman tur Boeing P8I reconnaissance aircraft paruk leh support system te lei a nih tur thu puan a ni dawn a; mahse, tunah rih chuan thulh rih a ni tih an sawi.
$ tluklehdingawn 3.6-a thlawhna inleisakna tura indawrna pawh hi a kal thui tawh hle niin an sawi bawk.