Tate McRae-i’n No.1 album a nei ve ta

Tate McRae-i’n No.1 album a nei ve ta
Tate McRae album thar, a studio album pathumna ni bawk ‘So Close To What’ chu Billboard 200 (albums) chart No.1-ah a debut a, a album he chart-a No.1 kai thei hmasa ber a ni a. a top 10 album pahnihna a ni bawk.
He album-ah hian Billboard Hot 100 (singles) chart a lang thei hla pathum a dah tel a, ‘Greedy’ chu No.3 a kai tawh a, “It’s OK, I’m OK’ chu nikum September khan No.20 kaiin, ‘Sports Car’ chu thla kalta khan No.21 a kai tawh bawk.
Tate McRae hian full-length studio album pathum nei tawhin, chung zinga pahnih chu top 10-ah a hlangkai ve ta a, December 2023 khan a album ‘Think Later’ chu Billboard 200 chart No.4 a lo kai taw bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Tate McRae ‘So Close To What’ hi kar khat chhungin US-ah 1,77,000 a hralh thei a, chung zingah 1,05,000 chu streaming (on-demand official stream maktaduai 137.30) atanga album tlukpui niin, McRae album kar khat chhunga stream tam ber a la ni a, album tak tak hralh pawh 71,000 tlingin, a album kar khata hralh tam ber a la ni a, album a hla mal hralhna atangin 1,000 a tling thei bawk.
Tate McRae hi chart top 10-a mithar lang thei awm chhun a ni a, PARTYNEXTDOOR leh Drake album intawm ‘$one $exy $ong’ chu 1,19,000 hralh lehin No.1 atangin No.2-ah a tawlh a, top 7-a lang album dang pawh chart No.1 hlui vek niin, Kendrick Lamar ‘GNX’ chu 1,06,000 hralh lehin No.3-ah bawk a la awm a, SZA ‘SOS’ chu 82,000 hralh lehin No.4-ah bawk a la awm a, Sabrina Carpenter ‘Short n’ Sweet’ chu 76,000 hralh lehin No.2 atangin No.5-ah a tawlh a, Bad Bunny ‘Debri Tirar Mas Fotos’ chu 63,000 hralh lehin No.5 atangin No.6-ah a tawlh a, The Weeknd ‘Hurry Up Tomorrow’ chu 50,000 hralh lehin No.6 atangin No.7-ah a tawlh ta bawk.
Chappell Roan ‘The Rise and Fall of a Midwest Princess’ chu 46,000 hralh lehin No.7 atangin No.8-ah a tawlh a, chart No.1 hlui Morgan Wallen ‘One Thing at a Time’ chu 41,000 hralh lehin No.9-ah bawk a la awm a, Billie Eilish ‘Hit Me Hard and Soft’ chu top 10 khartu niin, 41,000 hralh lehin No.8 atangin No.10-ah a tawlh ta bawk.