Taxi/autorickshaw online-a book theihna app siam mek

Taxi/autorickshaw online-a
book theihna app siam mek
Mizorama taxi leh autorickshaw-te online hmanga book theihna tur mobile application chu National Institute of Technology thawktute leh Directorate of Science & Technology-a MIRSAC mithiamten an buaipui mek.
Nilaini khan Mizoram University-ah national workshop – ‘AI-Driven Financial Empowerment for Mizoram’ tih hmangin neih a ni a. NIT Mizoram hnuaia project pakhat, ‘Economic Optimization Platform for Public Transport System for Mizoram’ thlirho niin, NIT Mizoram Computer Science and Engineering department-a asst professor-te leh MIRSAC scientist-te mobile application an siam chu Transport department nen tangdunin Mizorama taxi leh autorickshaw-te online hmanga book theihna tur a ni a, hman theih tura peihfel thuai beisei a ni tih an sawi.
Sawrkar laipui Department of Science and Technology kaihhruaiin National Mission on Interdisciplinary Cyber- Physical Systems (NM-ICPS) chuan IIT Bhilai hnenah Technology Innovation Hub host turin sum a pe a. IIT Bhilai hian AI Driven Financial Technology Project 36 a kalpui zingah Mizoram University tan project 6 leh NIT Mizoram tan project 5 a ruahman a ni tih sawi a ni bawk.
Workshop hmanpuitu MZU chief rector, larsap Gen. Vijay Kumar Singh (Retd) chuan tangkai taka artificial intelligence (AI) hman a nih theihnana inzirtirna buatsaih a ni chu lawmawm a tih thu a sawi a. AI tangkaina chuan thingtlang kilkhawr zawka chengte thleng pha ngei se a duh tih sawiin, mipui nawlpui tana hriatthiam awlsam leh tangkai taka hman theih dan ngaihtuah chunga hma la turin a chah.
National workshop hi Department of Science & Technology, MZU leh IBITF IIT Bhilai tangho buatsaih a ni a. Vawiinah chhunzawm a ni ang.