Taylor Swift ‘Cruel Summer’ a lar ber

Taylor Swift ‘Cruel Summer’ chu Billboard Global 200 chart-ah a No.1 a, he chart-a Swift hla No.1 kai thei pathumna a ni. He hla hi 2019-a a album ‘Lover’ ami kha niin, tunhnaiah The Eras Tour a neihah a sa lar leh a, single angin a tichhuak thar leh bawk. Hetihrual hian Inigo Quintero pawh a vawi khat nan chart top 5-ah an lang a, Tyla pawh a vawi khat nan top 10-ah a lang ve bawk.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only streams (subscription leh ad-supported audio leh video music services) leh download sales te chu tehna pawimawh a ni.
‘Cruel Summer’ hi kar khat chhungin khawvel huapin stream maktaduai 61.4 leh download sales 10,000 a tling thei a, hei hi chart-ah a No.1 pui ta a ni. Taylor Swift hian a hla dang ‘Anti-Hero’ chu he chart-ah hian nikum November khan kar li a No.1 pui a, 2021 November-ah tho ‘All Too Well (Taylor’s Version)’ chu kar khat a No.1 pui tawh bawk a, tihian he chart-a No.1 kai thei hla pathum neiin, hmeichhe zaithiam zinga he chart-a No.1 kai thei hla ngah ber Olivia Rodrigo a nihrual ta a ni. A nawlpuiah chuan BTS-in he chart-a No.1 kai thei hla ngah berin, pasarih an nei tawh a, Bad Bunny-a’n pali neiin, Swift, Rodrigo leh Drake ten pathum theuh an nei tawh bawk a ni.
He chart-a kar li No.1 thei Doja Cat ‘Paint the Town Red’ chu No.3 atangin No.2 a kai thar leh a, Tate McRae ‘Greedy’ pawh No.5 atangin No.3-ah a insawn a, Bad Bunny ‘Monaco’ chu No.1 atangin No.4-ah a tawlh ta bawk.
Iñigo Quintero “Si No Estás” chu stream maktaduai 56.5 leh sales 1,000 tlingin No.10 atangin No.5-ah a insawn a, he chart top 5-a a lan vawi khatna niin, he Spanish singer-songwriter hian TikTok leh Instagram a chhawr tangkai a ni.
South Africa lam zaithiam Tyla ‘Water’ chu stream maktaduai 43.6 leh sales 4,000 tlingin No.21 atangin No.9-ah a invawrh a, he chart top 10-a a lan vawi khatna a ni. Tyla pawh hian lar chhuah nan TikTok a hmang tangkai hle a ni.

Billboard Global 200 Top 10
1 Cruel Summer – Taylor Swift
2 Paint The Town Red – Doja Cat
3 Greedy – Tate McRae
4 Monaco – Bad Bunny
5 Si No Estas – Inigo Quintero
6 Seven – Jung Kook Featuring Latto
7 Perro Negro – Bad Bunny & Feid
8 3D – Jung Kook & Jack Harlow
9 Water – Tyla
10 Strangers – Kenya Grace