Taylor Swift Eras Tour Movie ticket presale-in AMC record siam

A Eras Tour hmanga record a siam deuh mawlh mawlh hnuah Taylor Swift chuan US state hrang hranga a Eras Tour concert movie cinema hall-ah October ni 13 atangin chhuah a ni dawn tih September ni 1 khan a puang a, he concert movie ticket hi lei theihin an zuar chhuak nghal a, darkar 24 chhungin AMC Theatres chuan ticket dollar maktaduai 26 man an hralh nghal a, hei hi AMC -in kum 103 chhunga ticket presale a darkar 24 chhunga sum an hmuh hnem ber record a la ni. A hmaa hetiang record siamtu chu 2021-a ‘Spider-Man: No Way Home’ kha niin, ticket presale-ah darkar 24 chhungin dollar maktaduai 16.9 man an hralh thei a, he record hi The Eras Tour movie hian darkar thum chhungin a khum hman niin AMC chuan an tarlang.
He concert movie hian ngaihven a hlawh bakah en tum an tam em avangin US-a AMC Theatre zawng zawngah Eras Tour movie hi Ningani, Zirtawpni, Inrinni leh Pathianni-ah te chuan nikhatah vawi li zel an tichhuak thin dawn a, ticket hi puitling tan dollar 19.89 (tax tel loin) a ni a, naupang leh kum upa lam tan dollar 13.13 man a ni ve thung.
September ni 1-ah khan ticket presale hi lei tum an tam lutuk avangin AMC app pawhin a buai phah a, online reservation tih theih loh khawpin a lun a, fan-te chu an awmna atanga AMC hnai berah anmahni ngei kal turin an ti ta ringawt bawk a ni. Eras Tour concert movie an tihchhuah lai vela film thar tlangzarh tur ‘Exorcist: Believer’pawhin Taylormania hi ngam lovin an tlangzarh hun tur kar khatin an sawn hlat phah ve nghal tawp mai bawk a ni.