Taylor Swift-i’n Innovator Award a dawng dawn

2023iHeartRadio Music Awards an sem turah Taylor Swift-i’n Innovator Award a dawng dawn tih an puang a, hetihrualhian P!nk pawhin Icon Award a dawng dawn bawk e. 2023 iHeartRadio Music Award hi Dolby Theatre, Los Angeles-ah March ni 27-ah an sem dawn a ni. Innovator Award hi Pharrell Williams, Justin Timberlake, U2, Bruno Mars, Chance the Rapper leh Alicia Keys te pawhin an lo dawng tawh.
iHeart chuan Swift hi rimawi lama a hlawhtlinna bakah, a rimawi hlawhtlinna te chu hmeichhia te dikna chanvo atana a tlangaupui nan leh intluktlanna chungchang puanzar nana a hman tangkai nasat avang te, thalaite inthlanna vote thlak tura a fuih nasat avang tea award hi hlan tur an nih thu an puang a ni.
iHeart chuan Swift hla hit, Billboard Hot 100 (singles) chart-a kar riat chhung No.1 thei, ‘Anti-Hero’ chu tunah pawh iHeartRadio-a hla play hlawh ber a la nih reng thu an puang bawk.
P!nk hi 2023 iHeartRadio Icon Award dawng tur niin, ani hi pop culture-ah a tha zawnga nghawng a neih len avang te, touring leh radio lama a hlawhtlin chuai mai thei lo leh khawvel hmun hrang hranga fan base nghet tha tak a neih avanga award hi dawng tur a nih thu an puang bawk.
iHeartRadio Music Award semnaah hian P!nk hi a perform nghal dawn a, ani bakah Kelly Clarkson, Keith Urban, Pat Benatar & Neil Giraldo, Muni Long, Cody Johnson leh Coldplay te pawh an perform ang.