Taylor Swift-i’n record a siam leh ta

Taylor Swift chanchinthar sawi tawh chuan record a siam thu a tel ta deuh zel mai, tunah pawh kar khat chhunga album stream nasat record a siam leh ta. Swift album thar ‘The Tortured Poets Department’ chuan US-a kar khat chhunga stream nasat-ah 2018-a Drake album ‘Scorpion’-in record a lo siam tawh chu a rawn khum leh ta.
‘TTPD’ hi an tlangzarh atanga ni ruk chhungin US-ah on-demand official stream maktaduai 799 a tling a, kar khat chhunga US-a album stream nasat ber record a siam. He album hi April ni 19-a tlangzarh kha niin, April ni 24 thlengin hetiang zat stream hi a kai hman a, Drake album ‘Scorpion’ kha 2018-a record a siam lai khan kar khatah US-ah vawi maktaduai 745.92 stream a kai man a ni.
TTPD hi US-ah ni ruk chhungin maktaduai 2.5 tlukpui an hralh tawh bawk a, chung zinga maktaduai 1.85 chu album tak tak hralhna niin, a dang zawng chu streaming leh hla mal hralhna atanga album tlukpui a ni.
He album hi karleh Billboard 200 (albums) chart-ah pawh a No.1 dawn chiang hle a, Taylor Swift album he chart-a No.1 kai thei 14-na a ni dawn a, hmeichhe zaithiam zinga he chart-a No.1 kai thei album ngah ber a nihna a sawhnghet leh sauh ang a, soloist zinga No.1 album ngah ber Jay-Z a nih rual dawn chiah bawk a ni. Overall-ah pawh phak loh pakhat chiah a nei tawh dawn a, chu chu The Beatles niin, anni hian No.1 album 19 an nei.
Kar khat chhunga US-a album hralh tam ber chu Adele ‘25’ kha niin, maktaduai 3.378 an hralh thei a, a pahnihna chu 2000-a *NSYNC album ‘No String Attached’ kha niin, maktaduai 2.416 an hralh thei a, a pathumna pawh *NSYNC album tho, 2001-a tlangzarh kha niin, maktaduai 1.878 an hralh thei a, tuna a landanah chuan Swift ‘TTPD’ hi pathumna a rawn ni thei dawnin a lang.