Taylor Swift-i’n Songwriters Hall of Fame record a siam

June ni 11 hian kumin atana Songwriters Hall of Fame-a lak luh turte puala hun hmangin, lakluhna inkhawm neih a ni tawh dawn a, kumina lak luh tur zinga record siam an awm a, an zingah hian Taylor Swift pawh a tel. Swift, kum 36, hi lak luh a nih hunah chuan SHOF a lakluh hmeichhe zinga naupang ber a ni dawn a ni. SHOF hi 1970 atanga kalpui tan a ni, hetih chhung hian Swift hi Hal David Starlight Award (hlaphuah thiam chhuak thar zinga hmalam hun nei tha a ngaihte puala award an pek thin) dawng thei zinga SHOF a lak luh ni thei hmasa ber a ni dawn bawk a ni. Hal David Starlight Award hi Swift hian 2010 khan a lo dawng tawh.
SHOF a lak luh tura thlan theih ni thei turin hlaphuah thiam ten an hlaphuah harlh sum chang thei tur chi an tihchhuah hmasak ber atanga kum 20 a ral phawt a ngai a, Swift hian a hlaphuah hralh sum a chang tur chia a tihchhuah hmasak ber chu ‘Tim McGraw’ tih hla niin, June 2006-ah a tlangzarh a, chuvangin kumin June thla hian Swift hi SHOF atan a qualify chiah bawk a ni.
Kumin SHOF a lak luh tur zinga pathum chu Grammy Awards a song of the year dawng tawh an ni a, Terry Britten leh Graham Lyle (Tina Turner sak ‘What’s Love Got To Do With It’), Kenny Loggins (The Doobie Brothers sak ‘What a Fool Believes’) leh Christopher Stewart (Beyonce sak “Single Ladies (Put a Ring in It)) te an ni. Taylor Swift hian Grammy Award song of the year-ah nomination tum riat a nei tawh nain award a la dawng lo tlat.
Kumin hian Hal David Starlight Award dawng turin British hmeichhe hlaphuahthiamin RAYE-i’n a dawng dawn a, British hmeichhe zinga he award dawng hmasa ber a ni dawn a, mipa lamah pawh Ed Sheeran chauhin a la dawng a, British zinga a pahnihna a ni dawn a ni.
Kumin hian SHOF chawimawina sang ber Johnny Mercer Award chu John Fogerty-a’n a dawng dawn a, Johnny Mercer Award dawng thei parukna a ni ang. He award hi Paul Simon, Smokey Robinson, Phil Collins, Van Morrison leh Lionel Richie te chiahin an la dawng.
Alanis Morisette pawh kumna SHOF a lak luh tur zingah telin, ani hi Juno Award-a songwriter of the year dawng tawh zinga SHOF a lak luh ni thei palina tur a ni. Gene Simmons leh Paul Stanley te pawh an band KISS chu Kennedy Center Honors-a chawimawi an nih atanga thla ruk hnu lawkah SHOF a lak luh an ni dawn bawk a ni.