Liverpool in Slot an ban
English club lian Liverpool chuan an manager Arne Slot an ban a, an manager thar atan AFC Bournemouth manager Andoni Iraola an dawr.
English club ropui Liverpool hian Arne Slot hi kum 2024 khan an manager ropui Jurgen Klopp hmunruak luah turin an la lut. Khawvela League ropui leh harsa ber English Premier League-ah tha takin bul a tan a, Reds hi a champion pui nghal.
|ha zetin bul tan bawk mah se 2025-26 season-ah erawh beisei an phak ta lo viau thung a, result tha an nei zawn hlei thei lo. Champions League quarter-final thleng bawk mah se EPL-ah khelh 38 atanga point 60 hmuin pangana daih an ni. UCL ah Arsenal an chetthat em vangin English club in UCL ah hmun an neih belh a, panganaa awm Liverpool hian chhawr tangkaiin UCL an khel dawn.
Season liam taah beisei an phak loh em vangin Liverpool tantute chuan an manager Arne Slot hi ban an duhna a rei tawh. Real Madrid in Xabi Alonso an ban hnu phei kha chuan Slot ban a, Alonso lak luh duhna a lian lehzual viau. Dinhmun derthawng takah a dinga ngaih a nih laiin a him hram zel a, season a tawp hnu pawhin a la cham tur thu a la sawi zui zel. Heti a nih lai hian Liverpool thuneitute chuan 2025-26 thlirletna an nei a, season tharah tha zawka inlan turin manager Arne Slot ban a, manager thar la lur turin thutlukna an leh ta zawk.
Arne Slot hian Liverpool a enkawl chhungin EPL ah vawi 42 a chak pui a, draw vawi 18 a neih bakah tlawm zawkah vawi 16 an tang a, chak record a neih hi 55.3% a ni a. Liverpool manager zingah record nei tha ber dawttu niin a chungah hian chak record 62.6% zet neitu Jurgen Klopp a awm. Record nei chhe lem lo viau mah se sum seng hnem tak chunga a chet that tawk loh vangin ban a ni ta tho a ni.
Liverpool hian kum 2025 nipui bazarah khan £415m zet an seng a, British club zingah bazar tum khata bazar nana sum seng hnem ber an ni hial nghe nghe. British transfer record ni turin Alexander Isak chu Newcastle United atangin an la lut a, a manah £125m zet an seng. Isak bakah hian player langsar Florian Wirtz an la lut tel bawk. Bazarah sum seng hnem mah se 2015-16 hnu lamah EPL-a point an hmuh tlem ber tum a ni a. Champion Arsenal an phak lohna hi point 25 zet a ni nge nghe.
Reds hian Slot hmunruak luahtu tur an dap nghal a, AFC Bournemouth chet thatpuitu Andoni Iraola chu an manager thar ni tura an duh ber niin tarlan a ni.