Taylor Swift leh Travis Kelce an innei ta
July ni 3, 2026 khan Taylor Swift leh Travis Kelce te chu New York City-a Madison Square Garden (MSG)-ah an innei ta a, an inneihna hi comedian leh actor Adam Sandler-a’n a kaihruai a, inneihnaah hian an thiantha leh laina hnai mi 1,000 vel an sawm an ni a, an misawm zingah mi lar tak tak an awm teuh nain Swift leh Kelce te hian anmahni dinpui turin an unaute an hmang ve ve a, Swift hian thianah a unaupa Austin a hmang a, Kelce pawhin a unaupa Jason thianah a hmang ve bawk.
Swift leh Kelce te inneih thlalak hi hmuh tur a la awm lo a, mo lawmnaa tel tura an sawmte hi privacy chungchangah zawm turte hriattir sa vek an ni a, he thu buatsaih lai thleng pawh hian inneih thlalak hi official-in an la tichhuak lo a, thlalak naran deuh, phone a lak tih vel pawh hmuh tur a la awm chuang lo. Hetihrual hian Swift leh Kelce te inneih thlalak ni a sawi viral a awm a, mahse, he thlalak hi AI ni a sawi a awm a, social media lamah chuan a darh chak hle a, a tak a ni nge ni lo tih erawh a hriat rih loh.
He inneih thlalak viral-ah hian Swift hian mokawr var leh veil inbelin, Kelce hian tuxedo dum a inbel ve thung a, Swift leh hian Kelce te hian an kut veilamin in tur an keng ve ve a, Swift hian a ban dinglamin Travis ban veilam a kuah bawk a, hetiang hian an misawm ta kara an kal lai thlalak hi a darh chu a ni.
Hetihrual hian an inneih kawr hi Christian Dior Haute Couture, Jonathan Anderson design niin report a awm a, ani hi Dior Women’s, Men’s & Haute Couture Collections-a creative director a ni a, Swift leh Kelce te hian an thawmhnaw ak tur design-naah hian Jonathan hi an thawhpui niin report a awm bawk. Hei bakah hian Christian Louboutin an bun ve ve a, Swift hian Cartier tlereuh a inbel bawk.
Inneih thutiam an chham zawh veleh an inneihna hmun MSG-ah chuan “JUST&T MARRIED!” tih screen-ah pawnlam atanga hmuh theih turin langsar takin an tarlang bawk. Swift leh Kelce te hian an inneih thuchham tur hi an ziak sa an chhiar niin media lamin an tarlang bawk.
Inneihnaa tel zawn zawng te hnenah hian handkerchief he inneihna puala siam, an inneih ni leh a hmun an ziah lanna leh Swift hla hit ‘Blank Space’ hlathu “So it’s gonna be forever…” leh “T&T” embroidery an thui tel bawk.
Inneihnaah hian Fleetwood Mac singer Stevie Nicks a perform a, mahse, eng hla nge a sak tih erawh puanzar a la ni lo. Swift leh Nicks te hi thiantha tak an ni a, 2010 Grammy Awards-ah pawh khan an lo perform dun tawh a, Swift ‘The Tortured Ports Department’ album pualin Nicks hian poem “For T – and me” tih pawh a phuah a, Swift hlaa a closing track a “Clara Bow” tih khan Stevie Nicks sawina a ni nghe nghe a ni.
He inneihnaah hian milar tak tak an tel nual a, Swift thiantha Selena Gomez leh a pasal Benny, Emma Stone, Zoë Kravitz, Ed Sheeran, Gigi Hadid, Bradley Cooper, Jack Antonoff, Ed Sheeran, Sabrina Carpenter, Haim sisters, Lena Dunham, Miranda Lambert, Maren Morris, Emma Stone, Tom Hanks, Steven Spielberg, Blake Lively, Cara Delevingne te pawh an tel.