Taylor Swift lemchangtuin a hlawh hnem

Taylor Swift lemchangtuin a hlawh hnem
Taylor Swift larna zarzotu zinga pakhat chu Olivia Mojica a ni ngei ang. Olivia hian Taylor Swift lem a chang thin a, an band Blank Space Tribute Band-in show an nei thin a, Taylor Swift an hla an sa thin a, vawi khat performance-ah dollar 20,000 te an la pha tlat.
Taylor Swift hi hmanni lawka Forbes-in billionaire list an tihchhua tharah dollar tluklehdingawn 1.6 nei angin an chhut a, khawvela hmeichhe musician hausa ber niin, musician zingah rimawi kaihhnawih ni lo sumdawnna dang tel lo a billionaire ni thei hmasa ber a ni bawk.
Olivia hian hmel leh pianah pawh Swift hi a chhun fuh ve viau a, an band hi hmun hrang hrangah perform tura sawm pawh an hlawh hle a, Swift hla sain mipui an awi thin a, Swift inchei dan leh a chet vel dan thlengin Olivia hian a entawn thin. Hetianga tribute band dina, Swift hla hrang hrang sa an perform thin hi amah, Taylor Swift phalna thlapa an ti an ni lehnghal.
Olivia hian a hna nghet pangngai neih pawh a bansan tawh a, tunah chuan full-time a eizawn nan Taylor Swift lemchan chu a hmang ta law law a, tunah chuan huang zauha world tour neih ve hial te pawh a tintuah ngam ta a ni.