Taylor Swift ‘Speak Now (Taylor’s Version)’ ni li chhungin kumina kar khat chhunga album hralh tam ber a ni hman

Taylor Swift ‘Speak Now (Taylor’s Version)’ ni li chhungin kumina kar khat chhunga album hralh tam ber a ni hman
Taylor Swift chuan a album hlui ‘Speak Now’ record thar lehin, hla thar paruk a dah belh a, ‘Speak Now (Taylor’s Version)’ tiin Zirtawpni kalta khan a tlangzarh a, he album thar hi ni li chhungin US-ah 5,75,000 an hralh hman a, kumina album tlangzarhah chuan kar khat chhunga hralh hnem ber a ni nghal der tawh a, karleh Billboard 200 (albums) chart-ah pawh a No.1 dawn tih a chiang nghal e.
Speak Now original album hi 2010-a a tlangzarh kha niin, Billboard 200 chart-ah No.1 a kai a, a record thar lehah hian a original album-a hla 14 bakah bonus track leh hla thar paruk a dah belh. Swift hian a album hlui ‘Red’ leh ‘Fearless’ te pawh record tharin, a Taylor’s Version album a lo tichhuak tawh a, Billboard 200-ah No.1-ah an debut ve ve a ni.
Tuna a album thar ‘Speak Now (Taylor’s Version)’ hi a No.1 leh a nih chuan Swift hian Billboard 200 chart-a No.1 kai thei album 12 a nei tling tawh dawn a, Barbra Streisand lehpelin, hmeichhe zaithiam zinga he chart-a No.1 album ngah ber a ni thei tawh dawn a, tunah hian No.1 album 11 ve ve neiin, Barbra Streisand hian hmeichhe zaithiam zinga No.1 album ngah ber an ni dun mek a ni. A nawlpuia lakah chuan The Beatles-in No.1 album 19 neiin an ngah ber a, Jay-Z-a’n 14 neiin a dawt a, Streisand leh Swift te hi pathumna an ni mek a ni.
Swift hian he album thar atang hian ‘I Can See You’ tih hla chu a music video nen a tichhuak leh tawh a, he video-a hi ama direct niin, a tawih hlui Taylor Lautner leh actress Presley Cash leh Joey King te pawh an inlan a. Video-ah chuan Swift-themed museum-ah security laser beam paltlangin Lautner leh King te chu an lut ru a, pindan awmkhauh chhunga tang Taylor Swift chhanchhuah tumin hmelma te an bei a, a tawp Swift chu an chhanchhuak ta a ni.
Taylor Lautner hi Twilight film hmuhnawm zet mai atanga kan hmelhriat kha niin, Swift nen hian 2009 khan rei vak lo an lo in-date ve zuai tawh a, Joey King leh Presley Cash te hi Swift music video ‘Mean’ tihah khan an inlan tawh a, chutih lai chuan kum 9 leh kum 13 mi chauh an la ni a, tunah erawh an puitling ta. Swift hian Kansas City-a Eras Tour show a neihnaah pawh stage-ah Lautner, King leh Cash te hi a ko chhuak a, Lautner hi a in-vawrh vir deuh zak zak bawk.