Taylor Swift ‘The Fate of Ophelia’ a la Hot ber

Taylor Swift ‘The Fate of Ophelia’ a la Hot ber
Taylor Swift hla hit ‘The Fate of Ophelia’ chu Billboard Hot 100 (US singles) chart-ah a No.1 a, he chart-ah hian kar li a No.1 tling ta. Hetihrual hian Kehlani ‘Folded’ pawh top 10-ah a rawn invawrh kai ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh dales data te chu tehna pawimawh a ni.
The Fate of Ophelia hian kar khat chhungin stream maktaduai 29.1 leh radio airplay ngaithlatu maktaduai 54.5 bakah sales 22,000 a la nei thei a, tihian chart-a a lan theihna hmasa ber-ah No.1-ah debut-in, kar li chhung a zawnin a No.1 tling ta a ni.
The Fate of Ophelia hi Taylor Swift hla he chart-a No.1 kai thei 13-na niin, Hot 100 chart-a No.1 kai thei hla ngahah palina a ni mek a, Hot 100 chart-a a hla hrang hrang No.1 an nih hun chhung belhkhawm chu kar 40 a tling ta chiah a, chart-a No.1 ni reiah pariatna a ni ta bawk.
Hot 100 chart-a No.1 ni rei ber record chu Maria Carey niin, kar 97 a No.1 tawh a, Rihanna (60), The Beatles (59), Drake (56), Boyz II Men (50), Usher (47), Beyonce (46), Taylor Swift (40), Bruno Mars (39) leh Michael Jackson (37) ten an dawt. (Beyonce total-ah hian Destiny’s Child anga kar 17 an No.1 chu belh tel a ni lo a, Michael Jackson total-ah pawh Jackson 5 anga kar 10 an No.1 chu belh tel a ni lo bawk.)
Hot 100 chart-a hla pakhat, kar li emaw a aia rei emaw No.1 nihpui thei ngah lamah pawh Taylor Swift hi pangana a ni mek a, ‘The Fate of Ophelia’ hi chart-a kar li chin No.1 thei hla panga a neihna a ni. Hot 100 chart-a kar li chin No.1 ni thei hla ngah ber chu Mariah Carey leh Rihanna te niin, hla pasarih ve ve an nei a, Beyonce leh Usher ten paruk ve ve neiin, The Beatles, Drake, Bruno Mars, Katy Perry leh Taylor Swift ten panga theuh an nei bawk.
The Fate of Ophelia hla awmna album ‘The Life of a Showgirl’ pawh Billboard 200 (US albums) chart-ah No.1 a la ni a, an pahnih hian chart-a an lan theihna hmasa berah an No.1 nghal ve ve a, chart-a an lan atanga a zawna kar li chhung No.1 ni nghal ve vein, hetiang hi chart-ah a vawi khatna a awm a la ni.
Tunkar chart-ah hian ‘The Life of a Showgirl’ album atangin hla pathum Hot 100 top 10-ah a la lang thei a, kar kalta chart top 10-ah khan hla pali neiin, a hmaleh karah hla pariat a nei a, a kar khatnaah top 10-ah hla 10 a hauh thei bawk. Tunkarah hian a hla dang ‘Opalite’ chu No.4-ah bawk a la awm a, ‘Elizabeth Taylor’ chu No.5 atangin No.8-ah a tawlh ve thung.
Chart No.1 hlui KPop Demon Hunters soundtrack HUNTRIX “Golden” chu No.2-ah bawk awm lehin, chart No.1 hlui tho Alex Warren ‘Ordinary’ pawh No.3-ah bawk a la awm a, Olivia Dean ‘Man I Need’ chu top 5 khartu niin, No.8 atangin No.5-ah a insawn a, he chart top 5-a a lan vawi khatna a ni a, Justin Bieber ‘Daisies’ chu No.7 atangin No.6 a kai thar ve leh ta bawk.
Kehlani hla ‘Folded’ chu stream maktaduai 13, radio airplay ngaithlatu maktaduai 32.9 leh sales 3,000 kaiin, No.14 atangin No.7-ah a invawrh a, he chart top 10-a a lan vawi khatna a ni.
Morgan Wallen “I Got Better” chu No.9-ah bawk awm lehin, Leon Thomas “Mutt” chu No.10-ah bawk a la awm.