Taylor Swift ‘The Tortured Poets Department’

Taylor Swift chuan thla kaltaa Grammy Award semnaah a award dawn lawmthu sawi pahin album thar ‘The Tortured Poets Department’ a tlangzarh dawn tih a puang kha a ni a, hei hi a album 11-na tur a ni a, April ni 19-a tlangzarh tur a ni. Grammy award a dawnnaa a album thar tur a puan zawh hnu minute reiloteah a album cover art a tichhuak nghal a, a caption-ah “Hmangaihna leh poetry-ah chuan engkim a thiang…” a ti a, “New album THE TORTURED PORTS DEPARTMENT” a ti bawk.
Taylor Swift hian tunhnaiah album a tlangzarh deuh mawlh mawlh a, 2021 hnuah a re-recorded album- Fearless, Red, Speak Now leh 1989 te a tlangzarh tawh a, a debut album ‘Taylor Swift’ leh ‘Reputation’ te hi a re-recorded album Taylor’s version tlangzarh leh tur a la nei a, mahse, ‘The Tortured Poets Department’ a tlangzarh tur thu a puan leh tak avangin heng re-recorded album pahnih te hi chu nghah leh deuh a la ngai dawn a ni.
A album title ‘The Tortured Poets Department’ tih hian ngaihven a hlawh viau a, eng emaw thu inthup a awm an ring leh thup a. An han hawi kual deuh a Swift-i tawih hlui Joe Alwyn leh Paul Mescal ten chat group ‘The Tortured Man Club’ tih an lo nei reng mai!
A album cover hi black-and-white niin, Swift hi top dum leh kekawrbul hmain, a kutin a inkuah a, puan var chungah a mu bawk a. Hei hi original 1989 cover nen a inang khawp mai. Stylist Joseph Cassell chuan Swift thawmhnaw inbel hi Mary Kate & Ashley Olsen te fashion brand The Row kutchhuak niin a sawi.
He album-ah hian hla 16 bakah bonus track pakhat a awm dawn a, he album-a hla ‘Fortnight’-ah chuan Post Malone a thawhpuia, hla dang ‘Florida!!!’-ah pawh Florence + The Machine a thawhpui bawk. Post Malone leh Florence Welch te hian tunhma deuh khan Swift hi an lo fak viau tawh nghe nghe a ni.
Swift hian he album hi kum hnih vel zet a buaipui tawh niin Japan-a Eras Tour a neihnaah a sawi chhuak a, “US-a ka tour lai te pawh khan ka buaipui zel a, kan duhthusam a nih hnuah, ka ngaihdan takah chuan nangmani tana a tha tawk a nih hnuah, ka zo ta a, inngaihthlak theih hun tur ka nghakhlel ve tak zet a ni,” tiin he album hi ‘Midnights’ album a zawh fel hnu lawk atanga a buaipui tan tawh niin a sawi a, Midnights hi October 2022-a a tlangzarh kha a ni.