Taylor Swift ‘TTPD’ a No.1 leh ta

Taylor Swift ‘TTPD’ a No.1 leh ta
Taylor Swift chanchin hi zia loh theih pawh a ni lo, tunlai rimawi khawvelah na na na chuan ani aia khawvela huhang nei lian an awm tlat lo, a album ‘The Tortured Poets Department’ pawh Billboard 200 (albums) chart-ah No.1 a rawn kai thar leh ta a, hetihrual hian Juice WRLD ‘The Party Never Ends’ pawh top five-ah a debut a, tun kum 64 chhunga a vawi kat nan Bing Crosby pawh top 10-ah a rawn lang ve leh ta bawk.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah, streaming atanga album hralhna tlukpui leh album a hla mal hralhna atanga album tlukpui te belhkhawm thin a ni.
TTPD hi kar khat chhungin US-ah 4,05,000 hralh lehin, chung zinga 3,68,000 chu album tak tak hralhna niin, streaming atangin 37,000 (on-demand official stream maktaduai 48.19) niin, hla mal hralhna erawh chhiar tham a ni lo.
TTPD hi a tlangzarh atanga kar 12 chhung a zawnin chart No.1 a ni taw a, chumi hnuah kar hnih chhung No.4-ah tawlhin, kar thum chhung a No.1 leh a, chuta tan chuan a tawlh ta hret hret a, top 10 atanga han chhuah chang te pawh a nei a, tunah a kar 16 nan a rawn No.1 leh ta a, hmeichhe zaithiam album-ah chuan he chart-a No.1 nih rei theihah pathumna a ni ta a, Adele ‘21’ (kar 24) leh Whitney Houston ‘The Bodyguard’ soundtrack album (kar 20) te chiah a pha lo.
TTPD hi April ni 19-a a tlangzarh daih tawh kha a ni a, Swift hian hla thar 15 dah belhin The Tortured Poets Department: The Anthology a tlangzarh thar a, hei hian album hralh a tikal thar leh ta a ni.
Tihian he chart a Taylor Swift album hrang hrang No.1 tawh te No.1 rei zawng belhkhawm chu kar 85 a tling ta a, Swift hian solo artist zinga he chart-a No.1 ni rei ber a nihna a sawh nghet leh ta sauh a ni. Swift hian No.1 album 14 nei tling tawhin, Jay-Z nen soloist zinga he chart-a No.1 album ngah ber an ni dun mek bawk.
Kendrick Lamar ‘GNX’ chu 1,65,000 hralh lehin, No.1 atangin No.2-ah a tawlh a, ‘The Wicked’ soundtrack pawh 1,08,000 hralh lehin No.2 atangin No.3-ah a tawlh ve ta bawk.
Rapper boral tawh Juice WRLD album thar ‘The Party Never Ends’ chu 86,000 hralhin No.4-ah a debut a, 84,000 chu streaming (on-demand official stream maktaduai 123.43) niin, album tak tak hralh chu 2,000 a ni a, hla mal hralhna chu chhiar tham a ni lo.
Juice WRLD hian chart top five a lang thei album paruk a nei tling ta a, ‘The Party Never Ends’ hi a thih hnua a album pathum an tlangzarhna a ni. Juice WRLD hi December ni 8, 2019 khan a thi a ni.
Chart No.1 hlui Sabrina Carpenter ‘Short n’ Sweet’ chu 68,000 hralh lehin No.3 atangin No.5-ah a tawlh a, Billie Eilish ‘Hit Me Hard and Soft’ chu 59,000 hralh lehin No.5 atangin No.6-ah a tawlh ta bawk.
Michael Buble Krismas album, December thla laihawl vel atanga chart top 10-a rawn lang thar leh thin ‘Christmas’ pawh 56,000 hralh lehin No.12 atangin No.7 a kai leh ta. He album hi 2011-a a tlangzarh tawh kha a ni a, December 2011 leh January 2012 thla tir thlengin a zawnin kar nga a No.1 a, chumi hnuah kumtin December thlaah top 10-ah a la lang chhunzawm ta ziah a ni.
Chappell Roan ‘The Rise and Fall of a Midwest Princess’ chu 52,000 hralh lehin No.10 atangin No.8 a kai thar leh ta bawk.
Bing Crosby pawh tun kum 64 dawn chhunga a vawi khat nan chart top 10-ah rawn langin, a compilation album thar ‘Ultimate Christmas’ chu 50,000 hralhin No.18 atangin No.9 a kai. Crosby hi 1977 khan a thi tawh a, he chart top 10-a a lanna hnuhnung ber chu December 1960 kha niin, a album ‘Merry Christmas’ chu chart No.9 a ni. He album hi January 1958-ah chart No.1 a lo kai tawh bawk.
Chart top 10 khartu chu chart No.1 hlui, Tyler, the Creator ‘CHROMAKOPIA’ a ni a, 49,000 hralh lehin No.4 atangin No.10-ah a tawlh ve ta a ni.